18.04.2025, 16:13 222
- Xankəndi şəhərinin azad olunmasından qısa müddət keçməsinə baxmayaraq, buranın ictimai və təhsil həyatı həqiqətən də öz təbii axarına qayıdıb, sosial həyat bərpa olunub. Qarabağ Universitetini ziyarət etdik. Tələbələri dinamik, həyəcanlı və enerjilidirlər. Tələbələr mühəndislik kimi bir çox sahələrdə təhsil alırlar, lakin ingiliscə də çox yaxşı danışırlar. Bu o deməkdir ki, Qarabağ bölgəsində, o cümlədən Xankəndi və Şuşada - bu bölgələrdə qarşıdakı dövrdə çox istedadlı insanlar yetişəcək.
Bu sözləri Türkiyənin ölkəmizdəki səfiri Birol Akgün Azərbaycanda akkreditə olunmuş diplomatik korpusun nümayəndələrinin Xankəndiyə səfəri çərçivəsində Qarabağ Universitetində keçirilən tədbirdən sonra bildirib.
“Biz Azərbaycan hökumətinin bu bölgədə həyata keçirdiyi işləri görməkdən məmnunuq. Bu, Prezident İlham Əliyevin dəstəyi, rəhbərliyi nəticəsində əldə olunub. Biz qardaş ölkə kimi Azərbaycanın uğurlarını, Qarabağdakı inkişafı görməkdən çox şadıq. Böyük Atatürkün dediyi kimi, “Azərbaycanın kədəri bizim kədərimiz, sevinci bizim sevincimizdir”, - deyə o əlavə edib. (AZƏRTAC)
