13.11.2025, 11:19 201
- Kəlbəcər rayonunun İstisu qəsəbəsinin layihələndirilməsi "Kooplayihə-AHB" firmasına həvalə edilib. Bunun üçün Kəlbəcər rayonunda Bərpa, Tikinti və İdarəetmə Xidməti ilə "Kooplayihə-AHB" arasında ümumi dəyəri 836 min 620 manat olan müqavilə imzalanıb.
"Vətən səsi" xəbər verir ki, Baş plana əsasən, gələcəkdə İstisu qəsəbəsində 159 fərdi ev, "townhouse" tipli 71 ev (142 mənzil) və 180 mənzildən ibarət 10 bina tikiləcək. Ümumi sahəsi 63,1 hektar olan qəsəbənin layihələndirilmə işləri mərhələli şəkildə aparılacaq. Birinci mərhələdə salınacaq ərazinin sahəsi 39,2 hektar təşkil edir. Bu mərhələdə iki, üç, dörd və beş otaqlı 159 fərdi evin inşası nəzərdə tutulur.
Bundan başqa, İstisu qəsəbəsində 352 şagird yerlik məktəb, 100 yerlik uşaq bağçası, inzibati bina, klub-icma mərkəzi, idman sağlamlıq mərkəzi, tibb məntəqəsi, bayraq meydanı, idman meydançası və digər zəruri obyektlər yaradılacaq.
Xatırladaq ki, 2004-cü ildə Bakı şəhərində qeydiyyata alınmış "Kooplayihə-AHB" firması yaşayış və inzibatı binaların, layihələndirilməsi və tikintisi sahəsi üzrə fəaliyyət göstərir. Firma işğaldan azad olunmuş ərazilərdə bir sıra layihələndirmə işləri həyata keçirib. Füzuli rayonunun Qarakollu kəndinin layihələndirilməsi üçün ötən ilin aprelindəı keçirilən tenderin də qalibi "Kooplayihə-AHB" firması seçilmişdi.
Elxan SALAHOV
