20.10.2025, 15:09 247
- İşğaldan azad olunmuş Füzuli şəhərində mərkəzi xəstəxana və Peşə Təhsil Kompleksinin tikintisi inşaat planına uyğun şəkildə davam etdirilir. Yaxın vaxtlarda isə şəhərdə növbəti yaşayış komlekslərinin inşasına başlanacaq.
"Vətən səsi" xəbər verir ki, bu barədə Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov bildirib. Onun sözlərinə görə, Füzuli şəhərində ikinci və üçüncü yaşayış komplekslərinin tikintisinə bu ilin sonu və gələn ilin əvvəlində start veriləcək: "Füzuli şəhərində üçüncü yaşayış kompleksinin tikintisinə ilin sonunadək başlanacağı nəzərdə tutulub".
Emin Hüseynov onu da əlavə edib ki, yaxın vaxtlarda Qarabağ Dirçəliş Fondu tərəfindən şəhərin mərkəzi parkının tikintisinə başlanılacaq: "Pirəhmədli kəndinin tikintisinə yeni başlanıb və 2026-cı ilin sonunadək orada işlər başa çatacaq. Bütün icra olunan layihələr Böyük Qayıdış Proqramında qoyulan hədəflərə tam uyğun olaraq icra olunur və tezliklə Füzuli şəhərində daha çox əhalini görəcəyik”.
Bütövlükdə isə gələn il üçün Füzuli rayonunda bərpa və yenidənqurma işlərinin miqyasının əhəmiyyətli şəkildə genişlənəcəyi gözlənilir. Hazırda rayonunun daha bir neçə yaşayış məntəqəsində, o cümlədən Dövlətyarlı kəndində fərdi evlərin tikintisi sürətlə davam etdirilir.
Elxan SALAHOV
