• Ermənistan kütləvi informasiya vasitələri son günlər dəfələrlə xəbər yayıb ki, noyabrın 23-də İrəvanda Kollektiv Təhlükəsizlik Müqaviləsi Təşkilatının Zirvə toplantısı keçiriləcəkdir. Rusiya Federasiyasının prezidenti Vladimir Putinin həmin toplantıda iştirakı və Nikol Paşinyanla keçirəcəyi təkbətək görüş isə daha çox xatırladılır. Noyabrın 22-də erməni KİV-lərinin əksəriyyəti belə bir xəbər yayıb ki, V.Putin ölkəyə gecə saatlarında gələcək. Erməni media mənsubları belə izah edirlər ki, buna səbəb Rusiya-Ukrayna müharibəsi ilə bağlı Putinin işləri çox olmaqla yanaşı, həm də İrəvandakı Qərb meyilli qüvvələrin etiraz aksiyası ilə qarşılanmaq istəməməsidir.

“Hraparak” media şirkətlər qrupunun xəbərlər portalının noyabrın 22-də günortaya yaxın yaydığı xəbərdən aydın olur ki, səhər tezdən “Zvartnots” hava limanından başlayaraq Ermənistan nazirlər kabinetinin binasınadək bütün yollar bağlanılıb.Bu barədə İrəvan polisi əhaliyə müraciət də edib. Bildirib ki, bu gün və sabah nazirlər kabineti binasına doğru uzanan bütün yollar bağlı olacaq, buraya hətta xüsusi icazə vərəqəsi olan vətəndaşlar da buraxılmayacaq.

“Lurer.com”informasiya agentliyi də müvafiq xəbərlər yayıb və bildirib ki, noyabrın 23-də “Dvin” otelində keçiriləcək KTMK Zirvə toplantısı ilə bağlı həm sözügedən oterlin, həm də nazirlər kabinetinin binasının hər tərəfində polis qüvvələri yerləşdirilib. Bunların içərisində yüksək rütbəli işçilər də çoxluq təşkil edir.

Milli demokratik “qütb”  və “5165” anti-rus təşkilatlarının rəhbərləri isə həm Putinin, həm də Belarus prezidenti Lukaşenkonun gəlişini etiraz aksiyaları ilə qarşılamaq qərarındadırlar. Övladları və qohumları itkin düşmüş ermənilər də sözügedən təşkilatla eyni mövqedədir. “Hraparak”ın şərhinə görə, hökumət Putinin və Lukaşenkonun etirazçılarla qarşılaşmaması üçün lazımi tədbirlər görüb və görməkdədir. Şəhərin yollarının bağlı, bir sıra ərazilərdə suyun, işığın olmaması  İrəvanı, “5165” təşkilatının həmsərdri Karin Ohanyanın dediyi kimi, ölü şəhərə çevrilib. KTMT isə heç bir möcüzəyə malik deyil ki, nə bu ölü şəhəri, nə də məhvə doğru gedən Ermənistanı dirildə bilsin.

Nəsib QARAMANLI