11.02.2026, 11:43 117
- Azərbaycanın beynəlxalq münasibətlər sistemində mövqeyinin möhkəmlənməsi istiqamətində atılan növbəti mühüm addım ABŞ ilə Strateji Tərəfdaşlıq Xartiyasının imzalanması oldu. Bu sənəd iki ölkə arasında siyasi dialoqun dərinləşməsi ilə yanaşı, iqtisadi, enerji və texnoloji sahələrdə əməkdaşlığın yeni mərhələyə qədəm qoyduğunu göstərir.
ABŞ ilə strateji tərəfdaşlıq Azərbaycan üçün nə vəd edir?
Milli Məclisin deputatı Vüqar Bayramovun sözlərinə görə, Xartiyanın imzalanması Azərbaycan-ABŞ əlaqələri üçün böyük perspektivlər açır: "Siyasi və strateji əməkdaşlıqla yanaşı, Azərbaycan-ABŞ münasibətləri enerji, ticarət və tranzitin də daxil olduğu regional bağlantılar və süni intellekt və rəqəmsal infrastrukturu ehtiva edən iqtisadi sərmayə istiqamətində də inkişaf etdiriləcək".
Deputat bildirib ki, 2025-ci ilin ilk 11 ayında ABŞ ilə Azərbaycan arasındakı ticarət dövriyyəsi 1 milyard 365 milyon dollar olub. Həmin müddətdə Azərbaycan Birləşmiş Ştatlara 54 milyon 491 min dollarlıq qeyri neft-qaz məhsulları ixrac edib. V.Bayramovun fikrincə, strateji əməkdaşlığın güclənməsinin Azərbaycanın ABŞ ilə qeyri neft-ixrac dövriyyəsinin daha da artmasına gətirib çıxaracağı gözlənilir:
"16 ölkəyə təbii qaz nəql edən Azərbaycan ABŞ-nin Avropadakı tərəfdaşlarının enerji təhlükəsizliyinin güclənməsinə xüsusi töhfə verir. ABŞ ilə strateji əməkdaşlıq qeyri-neft sektoruna daha çox texnologiya və innovasiyaların cəlb edilməsinə imkan yaradacaq. Bu, Azərbaycanda iqtisadi diversifikasiya ilə bağlı hədəflərin reallaşmasına dəstək olacaq".
Bu kontekstdə ABŞ–Azərbaycan strateji tərəfdaşlığı ABŞ texnologiyasının və sərmayəsinin ölkəmizə gəlməsi, ABŞ-ın iqtisadi fəallığı deməkdir.
Tahirə AĞAMİRZƏ
