Bu sözlər Milli Məclisin deputatı Bəhruz Məhərrəmov parlamentin plenar iclasında çıxışı zamanı deyib.
O qeyd edib ki, Ermənistan bizim qonşumuzdur, xarici siyasətimizin müəyyən istiqamətlərində bu amil nəzərə alınır, amma bütövlükdə Ermənistan bizim xarici siyasətimizin vacib hissəsi deyil. Biz artıq məsələmizi həll etmişik. Bundan sonra qalır sülh müqaviləsi, əldə olunacaq ya olunmayacaq, bunu daha çox ermənilər düşünsün. Bütün bunların fonunda, əgər bu gün Avropa Parlamenti heç bir hüquqi əsas olmadığı halda Azərbaycan əleyhinə qətnamələr qəbul edirsə, yaxud, bu gün Makron Prezident İlham Əliyev qarşısında heç bir şansı olmadığını bilə-bilə, Ermənistanı silahlandırırsa, vahid bir məqsəd var - erməni məsələsini gündəmdə saxlamaq. Amma göründüyü kimi, Prezident İlham Əliyev faktiki olaraq erməni məsələsini beynəlxalq gündəmdən çıxarmağı bacarıb.
“Ona görə də indi üzərimizə başqa məsələlərlə gəlməyə başlayıblar, məsələn iqlim dəyişiklikləri ilə mübarizə fonunda bizi neft-qaz ölkəsi olmaqda günahlandırırlar, baxmayaraq ki, onlar iddialarında səmimi olsaydılar bunu on illər əvvəl etməli idilər. Amma susurdular, çünki, əmin idilər ki, Azərbaycanı da neft lənətinə düçar edəcəklər, bir sıra ərəb və Afrika ölkələrində olduğu kimi, Azərbaycanda da oxşar sistem qurub, sərvətlərini rahat talayacaqlar. Lakin, Prezident İlham Əliyev üç gün öncə “Euronews”a müsahibəsində də ifadə etdiyi kimi “nefti inkişafa çevirməyə, sərvətin ədalətli paylanmasını təmin etməyə nail oldu”. Bu gün isə Azərbaycan qazı inkişafın yeni mərhələsində önəmli rol alır. Amma bu dəfə artıq həmin qlobal güclər daha yaxşı anlamağa başlayıb ki, Azərbaycanda təbii sərvətlərin inkişafa transformasiyasının qarşısını almaq mümkün deyil, ona görə də bu gün biz təbii sərvətlərə malik olmaqda günahlandırılırıq. Əlbəttə, bu, qərəzdir, Prezident İlham Əliyevin Bakıda Cənub Qaz Dəhlizi və Yaşıl Enerji Məşvərət şuralarının iclasında da bildirdiyi kimi, “qazıntı yanacağına malik olan ölkələrin fəaliyyəti onların ətraf mühitin müdafiəsi, yaşıl enerjiyə keçid məsələlərini necə həll etdikləri baxımından qiymətləndirilməlidir”. Nəinki regionumuzda, bütövlükdə neft qaz hasilatı ilə məşğul olan heç bir dövlət yaşıl enerji məsələlərində Azərbaycandan daha həssas davranmır”, - deyə Milli Məclisin deputatı vurğulayıb.
Onun sözlərinə görə, bu çirkab kampaniyaya rəhbərlik edən, 20-yə yaxın Atom stansiyası ilə təhlükə saçan Fransadan fərqli olaraq Azərbaycanın beş milli prioritetindən biri “Yaşıl artım” ölkəsi olmaqdır. Dünya ictimaiyyəti də artıq reallıqların fərqindədir və COP29-a ev sahibliyinin Azərbaycana həvalə edilməsi ölkəmizin bu istiqamətdə səylərinə verilən yüksək qiymətdir. (AZƏRTAC)