19.12.2023, 14:52 292
COP-29-un Azərbaycanda keçirilməsi mühüm bir hadisədir. " Bu fikirləri politoloq İlyas Hüseynov mətbuata açıqlamasında bildirib. Siyasi şərhçi qeyd edib ki, Azərbaycan bu məqsədə nail oldu: "Nəzərə almaq lazımdır ki, Şərqi Avropa blokunda Azərbaycan, Ermənistan və Bolqarıstan öz namizədliklərini irəli sürmüşdülər. Azərbaycanın Prezident Administrasiyası və Ermənistanın Baş nazirinin Aparatının birgə yaydığı bəyanatda görünür ki, Ermənistan Azərbaycanın xeyrinə öz namizədliyini geri çəkdi, bunun ardınca Bolqarıstan da geri çəkdi. Azərbaycan yekdil şəkildə bu təşkilatın keçirilməsinə evsahibliyi edəcək. Belə görünür ki, bir sıra dövlətlər, xüsusilə də Fransa Azərbaycanın bu mötəbər tədbirə evsahibliyi etməsindən narahatdır. Məhz bu xüsusda, Fransanın ictimai-siyasi xadimlərinin Azərbaycana etiraz əlaməti olaraq müraciət ünvanlamaları və bu haqda çıxış etmələri də qəbulolunmazdır. Fransa elə zənn edir ki, yalnız inkişaf etmiş, öz sözünü beynəlxalq miqyasda demiş dövlətlərdə bu cür tədbirlər keçirilə bilər. Lakin Azərbaycan beynəlxalq münasibətlər sisteminin tamhüquqlu üzvü olaraq bir sıra önəmli tədbirlərə evsahibliyi edib, uğurla bu missiyanın öhdəsindən gəlmişik. Avroviziya musiqi yarışmasının qalibi olmuşuq, Formula 1 yarışları hər il bizim ölkəmizdə keçirilir, Azərbaycan Bakı-2015 ilk Avropa Oyunlarını uğurla həyata keçirmişik, 2017-ci ildə İslam Həmrəyliyi Oyunlarını keçirmişik və bundan başqa çoxsaylı idman yarışları, musiqi yarışları keçirmişik. Bu da BMT səviyyəsində digər önəmli bir tədbirdir. Azərbaycan Qoşulmama Hərəkatına uğurlu sədrliyini həyata keçirir, Azərbaycan BMT-nin Təhlükəsizlik Şurasının qeyri-daimi üzvü olub. Yəni, Azərbaycan artıq adından kifayət qədər söz etdirib. Fransada buna qıcıq olmaları əlbəttə ki, onların islamafob, türkafob mahiyyətini üzə çıxarır, bu da hazırki çağdaş dövrümüzdə tamamilə qəbulolunmazdır", - deyə politoloq vurğulayıb.
Tahirə AĞAMİRZƏ
