• Müdafiə Nazirliyinin yaydığı məlumata görə, Ermənistanın təxribatı  davam edir. Bu gün səhər saatlarından Ermənistan silahlı qüvvələri vəziyyəti daha da gərginləşdirərək Basarkeçər rayonunun Zod istiqamətində yerləşən mövqelərindən Azərbaycan ordusunun üzbəüz mövqelərini minaatanlardan atəşə tutub. Nazirliyin məlumatına görə, Azərbaycan ordusunun bölmələri tərəfindən zəruri cavab tədbirləri görülüb. Toqquşmalar davam edir. Ermənistan tərəfi kamikadze dronlardan istifadə edir. Bu dəqiqəyə olan məlumata görə 5 güclü partlayış qeydə alınıb. Dronların daha geniş miqyasda istifadəsi gözlənilir. İlkin ehtimallara görə dronlar İran istehsalıdır. 

Məsələ ilə bağlı hərbi ekspert Ədalət Verdiyev “Vetensesi.az”a açıqlamasında bildirib ki, Ermənistan danışıqlarda heç zaman səmimi olmayıb: “Bu gün də səmimi deyil. Əvvəllər olduğu kimi, bu gün də sülh danışıqları öncəsi Ermənistan geniş miqyaslı təxribatlara əl atıb. Bu təxribatların qarşısını almaq üçün Azərbaycan tərəfi kifayət qədər ciddi tədbirlər görüb və adekvat tədbirlər görüləcək”.

Hərbi ekspert daha sonra bildirib ki, bu onu göstərir ki, Ermənistanın sülh barədə verdiyi bəyanatların heç bir əsası yoxdur: “Ermənistan heç bir zaman sülh danışıqlarında səmimi olmayıb, indi də belə bir niyyəti  yoxdur və daha əvvəllər olduğu kimi, bu dəfə də danışıqlar öncəsi  Ermənistan tərəfi geniş miqyaslı təxribatlara əl atıb, bu təxribatların qarşısının alınması üçün Azərbaycan tərəfi kifayət qədər ciddi tədbirlər görəcək və adekvat cavab tədbirləri çərçivəsində bu buferzonanın tarixi torpaqlarımız hesabına yaradılması da artıq kifayət qədər aktualdır. Təxribatların törədilməsi sülh danışıqlarını tamamilə şübhə altına alır. Azərbaycan ordusunun hərbi qulluqçusu öz tarixi torpağından açılan atəşlə suveren ərazilərimizdə şəhid olursa, belə bir vəziyyətdə, belə bir  münasibətlərin gərgin səviyyəsində hansısa sülh danışıqlarından söhbət gedə bilməz”.

Ədalət Verdiyevin sözlərinə görə, Ermənistana sülh lazım deyilsə, Azərbaycana bu sülh heç lazım deyil: “Bizim üçün sülh, Azərbaycan əraziləri 30 illik işğal altında qalan müddətdə lazım idi. İndi sülh daha çox Ermənistana lazımdır”.

Hərbi ekspert Ermənistan tərəfinin Azərbaycana qarşı qəsdən törətdiyi təxribatda  İran dronlarından istifadəyə də münasibət bildirib: “İran dronlarından istifadə məlumatları mövcud olsa da, onları hələ ki, təsdiqləyən foto və ya video-materiallar əlimizdə yoxdur. Amma hər bir halda İranın belə bir dronları Ermənistana verdiyi istisna edilməməlidir.

Əlimizdə video-materiallar olduqda, biz dronların markasını və imkanlarını araşdıra bilərik. Hələ ki, belə bir real görüntülər əlimizdə yoxdur. Odur ki, bu barədə hesab edirəm ki, danışmaq  bir qədər tezdir”, - deyə hərbi ekspert vurğulayıb.

Tahirə AĞAMİRZƏ