• ABŞ-dakı erməni lobbisinin 2023-cü maliyyə ili üzrə “Milli Müdafiə Maliyyələşmə Qanunu” (National Defense Authorization Act – NDAA) layihəsinə düzəlişlər edilməsi istiqamətində səyləri nəticəsiz qalıb.

ABŞ Konqresinin Nümayəndələr Palatasında 2023-cü maliyyə ili üzrə “Milli Müdafiə Səlahiyyət Qanunu” layihəsinin yekun mətni səsverməyə çıxarılıb. Bu qanun ABŞ Müdafiə Nazirliyinin illik büdcəsini və xərclərini müəyyən edən federal qanunlardan biridir.

“Milli Müdafiə Səlahiyyət Qanunu” 80-ni əleyhinə olmaqla, 350 səs çoxluğu ilə qəbul edilib. Qanun layihəsinin qəbulunun əleyhinə səs verənlərin siyahısında ermənipərəst mövqeyi ilə fərqlənən və illər boyu ABŞ-ın Azərbaycan və Türkiyə ilə ikitərəfli münasibətlərinə zərər vurmağa çalışan Adam Şif, Frank Paloun, Cudi Çu və Qus Bilirakis kimi konqres üzvləri var.

Mövcud qaydalara əsasən, qanun layihəsinin yekun mətni ABŞ Senatında da səsverməyə çıxarılaraq qəbul edilməli, daha sonra imzalanmaq üçün Prezidentə təqdim olunmalıdır.

Xatırladaq ki, ABŞ-dakı erməni lobbisi 2020-ci ildə Ermənistan ordusunun Azərbaycana məğlub olunmasından sonra daha aqressiv addımlar atmağa başlayıb. ABŞ Senatının ermənipərəst üzvləri olan, keçmişdə və hazırda korrupsiyada ittiham olunan Bob Menendez və Aleks Padiya tərəfindən 2023-cü maliyyə ili üzrə “Milli Müdafiə Səlahiyyət Qanunu” layihəsinə Azərbaycan əleyhinə 2 düzəliş, Nümayəndələr Palatasının ermənipərəst üzvləri olan, erməni əsilli Ceki Spiyer, Frank Paloun, Adam Şif və Toni Kardenas tərəfindən isə 5 düzəliş irəli sürülmüşdü.

Lakin ABŞ-Azərbaycan strateji tərəfdaşlığı və iki ölkə arasında inkişaf edən əlaqələrin önəm daşıması erməni lobbisinin səylərini nəticəsiz hala gətirib. Belə ki, Senatda irəli sürülmüş sözügedən düzəlişlərin və Nümayəndələr Palatasında irəli sürülmüş 5 düzəlişdən ikisinin (ABŞ-ın Azərbaycana yardımlarını qadağan edən 682 və 724 saylı düzəlişlərin) qəbulunun qarşısı alınıb, digər 3 düzəliş isə dekabrın 6-da Nümayəndələr Palatası və Senatın Silahlı Xidmətlər Komitəsinin üzvlərinin iştirak etdikləri konfransda qanun layihəsinin mətnindən çıxarılıb. Bununla da, Azərbaycanın əleyhinə irəli sürülmüş düzəlişlərdən heç biri 2023-cü maliyyə ili üzrə ABŞ-ın “Milli Müdafiə Səlahiyyət Qanunu” layihəsinin yekun mətnində öz əksini tapmayıb.

Eyni zamanda, sənədin Senata aid hissəsində Senatın Xarici Əlaqələr Komitəsinin sədri Bob Menendez və senator Aleks Padiya tərəfindən irəli sürülmüş iki düzəliş də keçməyib. ("Trend")