12.03.2023, 17:10 265
Vətən müharibəsi xalqımızın zəfər salnaməsinin baş tacıdır. Bu müharibə bir daha sübut etdi ki, Azərbaycan xalqı heç vaxt əyilməz. Bu müqəddəs savaşda canını, qanını əsirgəməyən oğullardan biri də Ramin İsmayıl oğlu Sadıqovdur. O, 25 iyun 1985-ci ildə Füzuli rayonunun Əhmədbəyli kəndində anadan olmuşdur. Elə həmin kənddə də tam orta məktəbi bitirmişdir. Məktəbi bitirdikdən sonra həqiqi hərbi xidmətə çağırılmış, Quru Qoşunlarında xidmət etmişdir. Ordudan tərxis edildikdən sonra MAHHXHQ kimi xidmətə qayıtmışdır. 44 günlük Vətən müharibəsində Xocavənd və Füzuli istiqamətində döyüşmüşdür. Bu döyüşlərin birində yaralanaraq hospitala göndərilmişdir. Azərbaycan Respublikasının Prezidenti cənab İlham Əliyevin sərəncamı ilə "Füzulinin azad olunmasına görə", "Xocavəndin azad olunmasına görə", "Cəsur döyüşçü" medalları ilə təltif olunmuşdur. Ailəlidir, III dərəcəli əlildir.
İsa Musayev
