05.01.2023, 13:35 420
- Bu gün Azərbaycanın Milli Qəhrəmanı, alay komandiri, milli ordumuzun qurucularından biri, polkovnik-leytenant, şəhid Şirin Mirzəyevin doğum günüdür. Bu münasibətlə Ş.Mirzəyevin yaxınları, döyüşçü dostları və ailə üzvləri Şəhidlər Xiyabanında onun məzarını ziyarət ediblər.
Ziyarət iştirakçıları Ş.Mirzəyevin döyüş yolundan, onun ordu quruculuğundakı rolundan, Qarabağ müharibəsində göstərdiyi qəhrəmanlıqdan danışıblar. Ziyarətçilər daha sonra Şirin Mirzəyevin silahdaşlarının Şəhidlər Xiyabanındakı məzarlarını da ziyarət ediblər.
Xatırladaq ki, Ş.Mirzəyev 1947-ci il yanvarın 5-də Xankəndində anadan olub. 1967-ci ildə Sankt-Peterburq Ali Siyasi Hərbi Məktəbini, 1988-ci ildə isə Hərbi Siyasi Akademiyanı bitirib. Uzun illər Sovet ordusunda xidmət edib. O, 1991-ci ildə Azərbaycanda ilk nizami özünümüdafiə taboru yaradıb. Alay komandiri kimi Ağdam rayonunun müdafiəsində, ayrı-ayrı yaşayış məntəqələrinin erməni quldurlarından təmizlənməsində böyük qəhrəmanlıq göstərib.
Ş.Mirzəyev 1992-ci il iyunun 18-də Sırxavənd istiqamətində aparılan döyüşlər zamanı minaya düşərək həlak olub. İyunun 20-də Bakıda Şəhidlər Xiyabanında dəfn olunub. Ölümündən sonra o, Azərbaycanın Milli Qəhrəmanı adına layiq görülüb.
Hazırladı: Mina RƏŞİD
