11.11.2022, 13:39 479
- Fərid Yaşar oğlu Fərəcov 1998-ci il noyabrın 11-də Ağcabədi rayonunun Muğanlı kəndində anadan olub. Ailənin üç uşağından ortancılı olan Fərid özündən böyük qardaşından və özündən kiçik bacısından çox fərqli xarakterə malik idi. O, elə uşaqlıqdan vətənpərvər, torpağa, Vətənə sonsuz sevgiylə bağlı idi. 2005-ci ildə Ağcabədi rayonunun Muğanlı kənd Sərvan Quliyev adına orta mətəbini birinci sinfinə gedən Fərid 2016-cı ildə həmin məktəbin 11-ci sinfini bitirib və 2016-2017-ci illərdə həqiqi hərbi xidmətdə olmuşdur. Xidməti dövründə topçu kimi fəaliyyət göstərmişdir.
Azərbaycan Silahlı Qüvvələrinin əsgəri olan Fərid Ermənistanın işğalı altında olan ərazilərin azad edilməsi uğrunda başlanan Vətən müharibəsi zamanı Füzuli uğrunda gedən döyüşlərdə iştirak edib və müharibənin ən çətin yollarından keçib. Dostlarına, yoldaşlarına sipər olub. Düşmənin keçilməz səddini keçdi, döyüşdü. Qarabağı azad görmək ona nəsib olacaqdımı, bilmirdi, bircə onu bilirdi ki, bu döyüşdən geri döndü yoxdu, qələbə qazanılmalıydı. Düşmənin yağış kimi yağdırdığı güllələrinə məhəl qoymadan düşmən qüvvələrini topa tuturdu. Oktyabrın 15-i isə həyatı ilə ölüm arasında gedən savaşla pəncələşdi. Artıq bu qəhrəman igid oğlumuzu düşmən hədəfə almışdı. Fərid Fərəcov 2020-ci il oktyabrın 20-də Füzuli uğrundakı döyüşdə qəhrəmanlıqla şəhidliyin ali məqamına yüksəldi.
Olümündən sonra “Vətən uğrunda”, “Cəsur döyüşçü” və “Füzulinin azad olunmasına görə” medalları ilə təltif edilib.
İndi Ağcabədi rayonunun Muğanlı kənd qəbristanlığındakı məzarı ziyarətgaha çevrilib. Onu ziyarətə gələnlərin sayı isə günbəgün artır.
Məkanında rahat yat, Şəhidim! Canından çox sevdiyin Qarabağı silahdaşların azad etdi və sənin, sənin kimi yüzlərlə qəhrəman Vətən oğlunun qisası alındı.
Tahirə AĞAMİRZƏ
