• Bolqarıstanın Veliko Tırnovo şəhəri orta əsrlərdə ölkənin paytaxtı olub və dövlətçilik tarixində mühüm yer tutub. Azərbaycanın mədəniyyət paytaxtı olan Şuşa isə xalqın zəngin mədəni irsinin, musiqisinin və ədəbiyyatının beşiyi hesab olunur. Şuşanın Bolqarıstan ictimaiyyətində tanıdılmasında bu ölkədəki Bakı Slavyan Universitetinin (BSU) Müqəddəs Kliment Orxidski adına Sofiya Universiteti nəzdində fəaliyyət göstərən Azərbaycan Dili və Mədəniyyəti Mərkəzinin rolu xüsusi qeyd olunmalıdır. Belə ki, UNESCO üzrə Azərbaycan Milli Komissiyasının və Azərbaycan Mərkəzinin dəstəyi ilə Elçin Əhmədovun “Şuşa – Azərbaycanın tarixi və mədəniyyət paytaxtı” kitabı bolqar dilinə tərcümə olunub və Şuşanın zəngin tarixi, mədəni irsi və xalqımız üçün daşıdığı mənəvi dəyər haqqında dolğun təsəvvürün formalaşmasına töhfə verib. Bu baxımdan, Şuşa və Veliko Tırnovo şəhərləri arasında qardaşlaşma əlaqələrinin təsis edilməsi tam məntiqli və ardıcıl addım idi. Beləliklə, “Şuşa” parkının salınması təşəbbüsü də Azərbaycan və Bolqarıstan tərəfdaşlığı sahəsində yeni imkanlar yaradacaq. İnanıram ki, Şuşa parkı yalnız simvolik məkan olmayacaq, eyni zamanda, müxtəlif mədəni tədbirlərin, sərgilərin və ictimai görüşlərin keçirilməsi üçün platforma rolunu oynayacaq. Bu isə xalqlar arasında mədəni mübadilənin və ünsiyyətin sürətləndirilməsini təmin edəcək, turizm və humanitar əməkdaşlıq üçün əlavə fürsətlər yaradacaq.

Bunu açıqlamasında BSU-nun Müqəddəs Kliment Orxidski adına Sofiya Universiteti nəzdində fəaliyyət göstərən Azərbaycan Dili və Mədəniyyəti Mərkəzinin müdiri Sofiya Şiqayeva-Mitreska deyib.

O, Azərbaycan və bolqar xalqları arasındakı mədəni əlaqələrin köklərinin dərin və çoxşaxəli olduğunu xatırladıb. Bildirib ki, tarixi baxımdan Avropa ilə Asiyanın kəsişməsində yerləşən ölkələrimiz arasında mövcud olmuş ticarət və mədəni münasibətlər xalqlarımız arasında qarşılıqlı təsir və ünsiyyət üçün möhkəm zəmin yaradıb: “XX əsrdə bu əlaqələr daha da genişlənərək yeni məzmun kəsb edib. Ən yüksək səviyyədə keçirilən mədəniyyət günləri, sərgilər, musiqi festivalları, akademik əməkdaşlıq iki ölkə arasında humanitar münasibətlərin inkişafına xidmət edib və bu gün də etməkdədir. Son illər ərzində Bolqarıstan və Azərbaycan arasında qardaşlaşmış şəhərlərin sayı da artmaqdadır. Onların arasında Şəki ilə Qabrovo, Sumqayıt ilə Burqas, Gəncə ilə Varna şəhərlərinin tərəfdaşlığını qeyd etmək olar. Bu əməkdaşlıq formatı şəhərlərarası əlaqələrin inkişafına, mədəni və humanitar layihələrin həyata keçirilməsinə geniş imkanlar yaradır”.

Qeyd edək ki, fevralın 12-də “Azərbaycan Respublikası Hökuməti ilə Bolqarıstan Respublikası Hökuməti və Veliko Tırnovo Bələdiyyəsi arasında Bolqarıstan Respublikasının Veliko Tırnovo şəhərində “Şuşa" parkının salınması və yenidən qurulması üzrə əməkdaşlıq haqqında Saziş” imzalanıb.

“Şuşa” parkı layihəsinin iki ölkə arasında mədəni və diplomatik münasibətlərin daha da dərinləşməsinə töhfə verəcəyi bildirilib. Vurğulanıb ki, bu sənəd “Şuşa” parkının salınması və yenidən qurulması istiqamətində tərəflər arasında əməkdaşlığın və layihənin icrasının hüquqi əsasını müəyyən etməklə yanaşı, iki ölkə arasında mədəni-humanitar əlaqələrin inkişafı baxımından mühüm əhəmiyyət daşıyır.