02.11.2022, 14:47 598
Abbasov Murtuz Çingiz oğlu 1998-ci il noyabrın 2-də Lerik rayonun Soru kəndində anadan olub. O, 2005-2016-cı illərdə Binəqədi rayonunun Sulutəpə qəsəbəsində 313 saylı tam orta məktəbdə təhsil alıb. Sonra uşaqlıqdan arzusunda olduğu Dövlət Sərhəd Xidmətinin Akademiyasına daxil olub. Vətəni canından çox sevən Murtuz 2020-ci ildə ali hərbi təhsilini bitirərək, gənc leytenant kimi Çevik Hərək Qüvvələrinin Çevik Hərəkət Briqadasında tağım komandiri kimi xidmətə başlayıb və raket-artilleriya silahlarının istismarı və təmiri mütəxəssisi kimi xidmət edib. Yüzlərlə igid kimi o da Vətən müharibəsinin ilk günlərindən öz tağımı ilə döyüşlərə qatılıb. Onun torpaqlarımızın azad olunması uğrunda mübarizəsi Ağdam rayonundan başlayıb. leytenant Murtuz Abbasov Füzuli, Cəbrayıl, Zəngilan və Qubadlı rayonlarının düşmən tapdağından azad olunması uğrunda gedən döyüşlərdə fəal iştirak edib.
2020-ci il oktyabrın 22-də Zəngilan rayonu ərazisində Vejnəli qızıl məıdəninin ələ keçirilməsi üçün Sığırt yüksəkliyi istiqamətində hərəkət edərkən bölüyü ilə birlikdə düşmən pusqusuna düşən leytenant Murtuz Abbasov 6 nəfər döyüş yoldaşı ilə birlikdə döyüşü öz üzərlərinə çəkərək bölüyün qalan heyətinin atəş altından çıxmasına şərait yaradıb. 30 nəfərin yaralandığı döyüşdə Murtuzla birlikdə bölüyün daha 6 nəfər hərbi qulluqçusu qəhrəmancasına şəhid olub.
Lerik rayonunun Soru kəndində izdihamla qarşılanmış, doğma torpaqa dəfn olunmuşdur.
Leytenant Abbasov Murtuz Çingiz oğlu ölümündən sonra Azərbaycan Respublikasının Prezidenti, Silahlı Qüvvələrin Ali Baş Komandanı ilham Əliyev tərəfindən 3-cü dərəcəli “Vətənə xidmətə görə” ordeni, “Vətən uğrunda”, Zəngilanın azad olunmasına görə” medalları ilə təltif olunub.
Allahdan bütün şəhidlərimizə rəhmət diləyirik.
Tahirə AĞAMİRZƏ
