• İlkin Məmmədov MMA idman növü üzrə 3 qat dünya çempionudur. O,  6 dəfə də Azərbaycan çempionu olub, beynəlxalq dərəcəli hakimdi. Hərbi xidmətini Xüsusi təyinatlı əsgər kimi başa vuran İlkin Məmmədov 2020-ci ildən müddətdən artıq Vətənə xidmətə başlayıb. Vətən müharibəsində Füzulidən Şuşaya qədər qəhrəmanlıqlarla dolu döyüş yolu keçib. Döyüşlərdə 2 dəfə yaralansa da yenidən cəbhəyə qayıdıb. İlkinin atası da Birinci Qarabağ Müharibəsi veteranıdı. Deyir ki, bizim o vaxt edə bilmədiyimizi İlkin kimi oğullar Şanlı Vətən Müharibəsində həyata keçirdi və Azərbaycana böyük Zəfər qazandırdılar.

İlkinin anası deyir ki, axırıncı dəfə noyabrın 2-də oğlum mənimlə danışdı. Sanki şəhid olacağını hiss eləmişdi. Dedi, ana, qürurlu ol və ailəsini tapşırdı...

Bu gün Şanlı Vətən Müharibəsinin qəhrəman şəhidi, kiçik çavuş İlkin Abdulla oğlu Məmmədovun doğum günüdür. O, 26 noyabr 1990-cı ildə Füzuli rayonunun Kürdmahmudlu kəndində anadan olub. 1997-ci ildə Kürdmahmudlu kənd tam orta məktəbinin 1-ci sinfinə qəbul olunub. Sonra ailəsi Abşeron rayon Saray qəsəbəsinə köçdüyünə görə İlkin 11-ci sinfi orada bitirib. 

İdmana böyük həvəsi olan və kiçik yaşlarından məşqlərə başlayan İlkin 2000-ci ildə karate üzrə Respublika çempionatında 3-cü yeri tutub. Gənc idmançı 2009-cu ildə həqiqi hərbi xidmətə çağırılıb. İlkin Azərbaycan Silahlı Qüvvələrinin N saylı hərbi hissənin Xüsusi təyinatlı bölməsində xidmət edib. 2012-ci ildən Hərbi Dəniz Qüvvələrində xidmətə qəbul olunub. İlkin Məmmədov MMA döyüş növü üzrə beynəlxalq dərəcəli hakimdir. O, 2020-ci ilin avqust ayından N saylı hərbi hissədə Vətənə xidmətə başlayıb.

Azərbaycan Ordusunun kiçik çavuşu İlkin Məmmədov 2020-ci il sentyabrın 27-də başlanan Vətən müharibəsi zamanı Hadrut qəsəbəsinin, Füzulinin və Şuşanın azadlığı uğrunda gedən döyüşlərdə ilk gündən silaha sarılaraq bir neçə döyüş əməliyyatlarında fəal iştirak edərək şücaətlər göstərib. İgid döyüşçü düşmənin xeyli canlı qüvvəsinin məhv edilməsində xüsusilə fərqlənib.

İlkin Məmmədov 2 noyabr 2020-ci ildə Şuşa şəhəri ətrafında gedən döyüşlərdə qəhrəmancasına şəhadətə ucalıb. Şəhidimiz Abşeron rayonunun Saray qəsəbəsində böyük izdiham və ehtiramla torpağa tapşırılıb.

İlkin Məmmədov şəhadətindən sonra ölkə Prezidentinin sərəncamlarına əsasən "Füzulinin azad olunmasına görə", "Xocavəndin azad olunmasına görə", "İgidliyə görə", "Vətən uğrunda" medalları və 3-cü dərəcəli  “Vətənə xidmətə görə” ordeni ilə təltif edilib.

Şəhidimiz ailəli idi, onun iki övladı Vətənə əmanət qalıb.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD