• Bu gün Kəlbəcər şəhəri günüdür. Bu gün bütün Azərbaycanın, türk dünyasının üzü gülür. Azərbaycanın Şanlı Zəfərindən artıq beş il ötür. Bu gün illərlə düşmənin viran qoyduğu Qarabağ və Şərqi Zəngəzur torpaqlarında elə möhtəşəm quruculuq işləri aparılır ki, bütün dünya buna heyrətlə tamaşa edir. Hazırda Kəlbəcərdə də gözəl, müasir bir şəhər salınır, kəndlər abadlaşdırılır. Kəlbəcərdən olan, filologiya üzrə fəlsəfə doktoru, araşdırmaçı jurnalist, şair İlham Məmmədli də bu gün doğma ocağını ziyarət edir. O, elə Kəlbəcərdən təəssüratını “Vətən səsi” ilə bölüşür.

İlham müəllim deyir ki, Kəlbəcər təkcə təbiətinin təkrarsızlığı ilə deyil, həm də zəngin təbii sərvətləri ilə Azərbaycanın gözəl guşələrindən biridir. Kəlbəcərin İstisuyu Çexiyada məşhur Karlovı Varı sularından da zəngindi. Kəlbəcər fərqli iqlim qurşaqları, əzəmətli dağları, keçilməz qayaları ilə gözəldi. Dəlidağ, Murov, Keyti dağı Kəlbəcərin əzəmətli simvollarındandı. Vaxtilə sovet hakimiyyəti illərində Azərbaycanın 30-a yaxın təsərrüfatı Kəlbəcər rayonuna gələrdi. Aran rayonlarından istidən əhali bura, Kəlbəcər dağlarına köç edərdi. Yadımdadı ki, o zaman aparılan statistikaya görə hər yay Kəlbəcərdə əhalinin sayı 3 dəfə artırdı.

Kəlbəcər Azərbaycan tarixinin ən qədim səhifələrini özündə yaşadan bir bölgədi. Qobustan qayaüstü abidələrinin Dəlidağda çoxsaylı oxşarı var. Kəlbəcər Azərbaycan tarixinin bir neçə mərhələsini özündə birləşdirib. Bu yer “Kitabi- Dədə Qorqud”da söhbət açılan qədim bir oğuz yurdudu.

30 ildə ermənilər Kəlbəcərdə böyük bir dağıntı törətdilər. Rayonda, kəndlərdə bircə salamat tikili də qalmadı. Şükürlər olsun ki, Kəlbəcər bu gün azaddı. Yavaş-yavaş erməni vandallarının vurduğu yaralar müalicə olunur. Bu gün Kəlbəcərdə çox gözəl bir hava var. Burada müasir bir şəhər tikilir. Kəndlərimizin bir çoxunda quruculuq işləri başlayıb.

Azıx mağarasından sonra Azərbaycanın ən qədim insan məskəni olan Zar kəndinin adı vaxtilə Şəhrizər olub, yəni qızıl şəhəri... İndi Zar kəndi yenidən tikilir. Mənim üçün çox xoşdu ki, bu kəndi yenidən görməyi Allah mənə də nəsib elədi...

Mən inanıram ki, yaxın illərdə Kəlbəcər yenə də Azərbaycanın ən gözəl bölgələrindən biri olacaq. Kəlbəcərin turizm baxımından çox zəngin potensialı var, onu Azərbaycanın İsveçrəsi adlandırırlar. Burada istər qış, istər yay turizminin infrastrukturunu yaratmaq olar.

Hazırladı: Mina RƏŞİD