25.11.2025, 09:34 238
- Elvin 7 uşaqdan biri kimi böyük bir ailədə dünyaya gəlmişdi. Ata-anasının əziyyətinə, yükünün ağırlığına görə Elvin heç orta təhsilini də uğurla başa vura bilməmişdi. Atasına təsərrüfat işlərində kömək olan bu balaca oğlan hərbçi olmaq istəyirdi. O, hərbi xidmətini şərəflə yerinə yetirdi. Onun hərbçi olmaq arzusu isə Vətən müharibəsi başlananda daha da alovlandı. Elvin Vətən müharibəsinə könüllü yollandı və qəhrəmanlıq dərsindən, Vətənə xidmətdən əla qiymətlər alaraq özü də Zəfər tariximizi yazanlardan birinə çevrildi...
Bu gün Şanlı Vətən Müharibəsinin qəhrəman şəhidi Ağayev Elvin Valeh oğlunun doğum günüdür. O, 25 noyabr 1997-ci ildə Xaçmaz rayonunda, Məmmədxanlı kəndində anadan olub. Kənddə orta məktəbə gedib. 2015-ci ildə hərbi xidmətə yola düşüb.
Elvin Ağayev 2020-ci il sentyabrın 27-də də başlanan Vətən müharibəsinə könüllü yollanıb. O, Füzulinin azadlığı uğrunda gedən qanlı döyüşlərdə mərdliklə vuruşub.
Ordumuzun igid əsgəri Elvin Ağayev 29 oktyabr 2020-ci ildə Füzulinin Alxanlı kəndi uğrunda gedən ağır döyüşlərdə qəhrəmancasına şəhadətə ucalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamları ilə Elvin Ağayev "Vətən uğrunda", "Cəbrayılın azad olunmasına görə", "Xocavəndin azad olunmasına görə" və "Füzulinin azad olunmasına görə" medalları ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
