• Mətbuatda 40 ildən, “Vətən səsi” qəzetində 20 ildən çox çalışan həmkarımız Tahirə Ağamirzə qızı Ağamirzəyevanın 60 illik yubileyidir. Bu münasibətlə Tahirə xanımı ürəkdən təbrik edir, ona cansağlığı, xoş günlər, yaradıcılıq uğurları arzulayırıq.

Tahirə xanım 1965-ci ilin oktyabr ayının 10-da Qubadlı rayonunun Dəmirçilər kəndində anadan olub. 1973-cü ildə Dəmirçilər kənd 8 illik məktəbinin 1-ci sinfinə gedib, 1983-cü ildə Dondarlı kənd orta məktəbini əla qiymətlərlə başa vurub.

1984 -1987-ci illərdə “Avanqard” (indiki “Bəgüşad”) Qubadlı rayon qəzetində ədəbi işçi, müxbir vəzifələrində çalışıb. Ədəbi yaradıcılığa məktəb illərindən başlayıb və Tahirə Kədərli imzası ilə yazdığı şeirlər yerli qəzetdə dərc edilib. Yazıları ilə diqqəti cəlb edən gənc şairə redaksiya tərəfindən mükafatlandırılıb.

1995-ci ildən başlayaraq “Yeddi gün”, “Ana Vətən”, “Vətən səsi” və “168 saat” qəzetlərində çalışıb. Yazıları, mənsur şeirləri “Ədalət”, “Şəhriyar”, “Təzadlar”, “Dünyaya pəncərə” və “Bütöv Azərbaycan” qəzetlərində çap olunub.

“Dərdin qucağında böyümüşəm”, “Günahımı gözlərimə bağışla” , “İlahi Nura doğru” və “Sevgi yolları” adlı kitabların müəllifidir. Onun Türkiyə tükcəsində yazdığı iki kitabı qardaş ölkədə çap olunub.

Tahirə xanım müxtəlif mövzularda yazdığı məqalələrinə görə AKİVHİ tərəfindən “Xan qızı Natəvan” diplomuna, “Qafqaz” Media İctimai Birliyi tərəfindən “Vicdanlı qələm” mükafatına, ədəbi yaradıcılığının 25 illiyi münasibətilə “Peşəkar jurnalist” adına layiq görülüb. 2011-ci ildə Türkiyənin Azərbaycandakı səfirliyi tərəfindən keçirilən yazı müsabiqəsində uğur qazanaraq diplomla təltif edilib. Şeirləri Türkiyə mətbuatında dərc edilir və “İstanbul Şiir Fırtınası” radiosunda səsləndirilir. “Məhsəti” Şairlər Məclisinin üzvüdür. Hazırda 4 kitab üzərində çalışır.

Doğum günündə Tahirə xanımın Yurd sevdalı şeirlərindən “Vətən səsi”nin oxucularına ərməğan edirik.  

 

Tahirə Kədərli

SALAM, ŞUŞA!

 

Mən öncə sənə gəldim,

həsrətiylə yandığım

doğulub boy atdığım

dil açıb danışdığım

doğma kəndimə deyil,

Əziz Şuşam, ilk dəfə

sənə gəldim...

daşını, torpağını,

müqəddəs oylağını

mən heç görməmişdim.

səsini, sorağını, o saf növrağını

dillərdən öyrənmişdim.

hələ uşaqlığımdan

üzünü görməsəm də,

qoynuna gəlməsəm də,

mən səni çox sevmişdim.

 

Əziz Şuşam!

Uşaqkən elə bilirdim

şüşədən bir ev olmusan...

bu sehirli aləmin xəyalıyla yatırdım.

uşaqlıq xəyalıma yuxularda çatırdım...

evdə böyüklərimiz

səni vəsf eyləyirdi.

“Şuşa candır”, deyirdi...

böyüdüm öyrəndim ki,

yenilməz qala olmusan.

dahilər yetişdirib şan-şöhrət qazanmısan...

sən Azərbaycanın tarixi torpağısan...

qoynunda pərvazlanıb

neçə oğulun, qızın.

dillərdə dastan olub

muğamın, tarın, sazın...

 

İlk dəfədir sənə gəldim, Şuşam.

ey müqəddəs torpağım,

qoy səndə dalğalansın

bu üç rəngli bayrağım!

nələr çəkdi başın sənin,

müqəddəsdir, uludur

torpağın, daşın sənin...

Burda neçə igidin qanlı xatirəsi var...

burda neçə igidin

Şanlı Qələbəsi var.

Burda xain düşmənin

gözləri oyulubdu.

burda xain düşmənin

planı pozulubdu.

bu daşdan, qayalardan

İgidlərim güc alıb.

burda neçə igidim

gözləri gülə-gülə

şəhadətin oxuyub.

Burda neçə igidim

Zəfər səsini duyub...

Kiminin son kəlməsi

kiminin son gülləsi

bu torpağa yazılıb...

Ey müqəddəs torpağım,

qoy səndə dalğalansın

bu üç rəngli bayrağım!.

 

Salamat qal, əziz Şuşam...

gedirəm, qayıdacam,

bil ki, ölənə kimi

mən səndən doymayacam...

***

Gələcəm sənə, Vətən!

siləcəm göz yaşını...

yarana məlhəm olacam,

söz, heç yana

getməyəcəm,

elə səndə qalacam...

Orda yağış yağır,

hava soyuqmu?

üşümə, gözüm nuru,

üşümə...

Orda gün çıxıb

təpidir yeri...

daşı, torpağı sevinir,

hələ saralmayan,

qürurlanan

yarpağı sevinir

kəndimin...

Orda gecələrin

aydı qonağı...

hələ günəşinin

var parlamağı...

Bir ildir igidlərimin

qanı ilə sivarılsa da

bir ildir ciyərimiz

parça parça olsa da...

azaddır torpağım,

azaddır kəndim,

Şükürlər olsun!

Şəhidlərimin hər

ayaq izlərinə,

tökülən qanlarına...

gedib orda səcdə

etmək istəyirəm...

Məkkəm, Mədinəmdir

Şəhid qanı ilə dolan torpağım!..

Alnımı qoyacağım möhür

donan şəhid qanıdır...

O şəhidlərim ki, bu gün

Azərbaycanımı bütün

Dünyaya tanıdır....

Hazırladı: Mina RƏŞİD