• Bu gün Şanlı Vətən müharibəsinin qəhrəman şəhidi İntiqam Allahverdi oğlu Abdullayevin doğum günüdür. O, 12 avqust 1998-ci ildə Naxçıvan Muxtar Respublikasının Ordubad rayonunun Düylün kəndində anadan olub.

İntiqam orta təhsilini şəhid Surxay Rzayev adına Düylün kənd məktəbində alıb. 2013-cü ildə Heydər Əliyev adına Hərbi Liseyə daxil olub.  2016-cı ildə liseyi idman (voleybol) üzrə fərqlənmə dərəcəsi ilə bitirərək, Heydər Əliyev adına Azərbaycan Ali Hərbi Məktəbinə qəbul olunub.

Heydər Əliyev adına Azərbaycan Ali Hərbi Məktəbində oxuduğu müddətdə, öz sevimli idman növü ilə də məşğul olub. Qatıldığı yarışlarda dəfələrlə fərqlənən İntqam Abdullayev, fərdi və komanda şəklində medallara, fəxri fərmanlara və fərqlənmələrə layiq görülüb. Bununla yanası o Türkiyə və Gürcüstanda da keçirilən voleybol yarışlarında öz komandasının iştirakı ilə iki dəfə qalibiyyətə imza atıb. Hər iki ölkədə də fərqlənən İntiqam Abdullayev, sonradan bu komandanın kapitanı kimi də çıxış edib. İdmanla yanaşı öz hərbi ixtisasında da daim üçrəngli Azərbaycan bayrağını zirvələrdə tutan Abdullayev, 2020-ci ildə Azərbaycan Ali Hərbi Məktəbini motoatıcı ixtisası üzrə bitirib.

Heydər Əliyev adına Azərbaycan Ali Hərbi Məktəbini bitirdikdən sonra "leytenant" hərbi rütbəsi alan İntiqam Abdullayev dəfələrlə uğurlu əməliyyatlara imza atmış və böyük döyüş yolu keçmişdi. Qazax rayonunda yerləşən "N" saylı hərbi hissədə taqım komandiri vəzifəsinə təyin edilmişdi.

Xidmətinin 2-ci ayında olmasına baxmayaraq, leytenant Abdullayev "N" saylı Hərbi hissənin "Ən yaxşı Taqım Komandiri" adına layiq görülmüş və "N" saylı Hərbi hissənin briqada komandiri tərəfindən "Fəxri fərman" və qiymətli hədiyyə ilə mükafatlandırılmışdı.

Azərbaycan Ordusunun leytenantı olan İntiqam Abdullayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində Murovdağ döyüşlərində iştirak edib.

2 oktyabr 2020-ci il Murovdağ uğrundə gedən döyüşlərdə qəhrəmancasına şəhid olub. İntiqam Abdullayevin cənazəsi uzun müddət tapılmayıb və itkin düşmüş sayılıb. Şəhadətindən 165 gün sonra onun şəhid xəbəri gəlib.

Şəhidimiz böyük izdiham və ehtiramla Ordubad rayonunun Düylün kəndində dəfn olunub.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən İntiqam Abdullayev ölümündən sonra "Vətən uğrunda", "Kəlbəcərin azad olunmasına görə", “Şücaətə görə” medalları və “3-cü dərəcəli Rəşadət ordeni” ilə təltif edilib. 

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD