• Zaurun atasıyla anası Cəlilabad rayonu, Göytəpə şəhərindəki N saylı hərbi hissədə tanış olublar. Anası deyir ki, Nizamı gizir, mən isə tibb bacısı idim. Biz ailə qurduq və iki övladımız dünyaya gəldi. 2005-ci ildən Zaurla Xavəri tək böyütdüm. Qızım ailə həyatı qurdu. Özüm isə 2015-ci ildə təqaüdə çıxdım. Zaur hərbidən ayrılandan sonra 2018-ci ildə Bakı şəhərinə köçdük. Mən özüm Birinci Qarabağ müharibəsinin veteranıyam, döyüşlərdə iştirak etmişəm. Vətənin, vətənpərvərliyin nə olduğunu yaxşı bildiyimdən oğlumun müharibəyə getməsinə mane ola builmədim, heç ola da bilməzdim...

Bu gün Vətən müharibəsinin qəhrəman şəhidi Zaur Nizami oğlu  İsmayılzadənin doğum günüdür. O, 1995-ci il iyulun 29-da Lənkəran rayonunun İstisu qəsəbəsində anadan olub. 2001-2012-ci illərdə şəhid Vüqar Məmmədov adına Cəlilabad rayon Göytəpə şəhər tam orta məktəbində təhsil alıb. 2013-2015-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət edib. 2015-2017-cı illərdə Azərbaycan Xüsusi Təyinatlı Qüvvələrinin sıralarında "gizir" rütbəsi ilə xidmətini davam etdirib. Zaur “Aprel döyüşləri”nin iştirakçısıdır. Həmin döyüşlərdə yaralanıb, 2017-ci ildə ordudan tərxis olunub.

Gizir Zaur İsmayılzadə 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində könüllü olaraq döyüşlərə qatılıb. Sentyabrın 29-dan Füzuli uğrunda gedən qanlı döyüşlərdə şücaətlər göstərib.

Zaur İsmayılzadə oktyabrın 7-də Füzuli rayonu istiqamətində döyüş tapşırığının yerinə yetirilməsi zamanı qəhrəmancasına şəhadətə ucalıb. Şəhidimiz doğma Lənkəranda böyük izdiham və ehtiramla torpağa tapşırılıb.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən Zaur İsmayılzadə ölümündən sonra 3-cü dərəcəli "Vətənə xidmətə görə" ordeni və "Vətən uğrunda", "Cəsur döyüşçü", Füzulinin, Şuşanın azadlığına görə medallarla təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD