• Xocavənd Rayon İcra Hakimiyyətinin və Qərbi Azərbaycan İcmasının birgə təşkilatçılığı ilə “Qərbi Azərbaycan İrsi: Ermənistanda azərbaycanlıların maddi-mədəni irsinin-qəbiristanlıqların sistemli qaydada dağıdılmasının nəticələri və beynəlxalq hüquqi məsuliyyətə dair hesabat və materiallar” kitabının I cildinin təqdimat mərasimi keçirilib. Təqdimat mərasimində Xocavənd Rayon İcra Hakimiyyətinin başçısı Eyvaz Hüseynov, Milli Məclisin deputatı Şahin İsmayılov, YAP Xocavənd Rayon Təşkilatının sədri Vüsal Hüseynov, RİH-in məsul işçiləri, hüquq-mühafizə orqanlarının, idarə və təşkilatların rəhbərləri, şəhid ailələri, ziyalılar və rayon ərazisində məskunlaşan qərbi azərbaycanlı ailələrin təmsilçiləri iştirak ediblər.

Tədbir iştirakçıları öncə 500 ailəlik Xocavənd qəsəbəsində Rayon İcra Hakimiyyətinin inzibati binasının qarşısında yerləşən ümummilli lider Heydər Əliyevin büstü önünə gül dəstələri düzüb, onun əziz xatirəsini ehtiramla yad ediblər. Rayon Mədəniyyət evində davam etdirilən tədbirdə Azərbaycan Respublikasının dövlət himni səsləndirilib, eyni zamanda Ümummilli lider Heydər Əliyevin, eləcə də ölkəmizin ərazi bütövlüyü uğrunda canından keçmiş şəhidlərimizin əziz xatirələri bir dəqiqəlik sükutla yad edilib. Daha sonra “Qərbi Azərbaycan İrsi” tədqiqatlar seriyası başlıqlı videorolik nümayiş etdirilib. Xocavənd Rayon İcra Hakimiyyətinin başçısı Eyvaz Hüseynov çıxış edərək bildirib ki, 2025-ci ilin “Konstitusiya və Suverenlik İli”nin elan olunması Azərbaycan dövlətçiliyinin ideoloji əsaslarını gücləndirməklə yanaşı, müasir geosiyasi çağırışlara cavab verən milli mövqeyimizin möhkəmləndirilməsinin bəyan edilməsi baxımından xüsusi əhəmiyyət daşıyır. Eyvaz Hüseynov qeyd edib ki, ümummilli lider Heydər Əliyev Azərbaycanda ikinci dəfə siyasi hakimiyyətə gəlişindən sonra Qərbi Azərbaycandan deportasiya olunan soydaşlarımızın hüquqlarını daim gündəmdə saxlayır, onların qayıdış hüququnu beynəlxalq hüquq normaları çərçivəsində müdafiə edirdi. Bu ideoloji xətt bu gün Prezident İlham Əliyev tərəfindən strateji səviyyədə davam etdirilir. Prezidentin rəhbərliyi ilə “Qərbi Azərbaycana Qayıdış Konsepsiyası”nın hazırlanması və hüquqi əsaslar üzərində qurulması, məsələnin təkcə emosional deyil, rasional və diplomatik çərçivədə təqdim olunmasını təmin edir. Milli Məclisin deputatı Şahin İsmayılov Qərbi Azərbaycandan azərbaycanlıların kütləvi şəkildə köç etməsinin, tarixi torpaqlarda demoqrafik dəyişikliyin aparılmasının və bunun nəticəsində etnik-mədəni irsin təhlükə altına düşməsinin əsas problemlərdən biri olduğunu qeyd edib. Əlavə edib ki, aparılan araşdırmalar və statistik məlumatlar göstərir ki, son əsrlərdə Qərbi Azərbaycanda yaşayan azərbaycanlıların sayı kəskin şəkildə azalmışdır. Bu prosesin əsas səbəbləri deportasiyalar, zorakı köçürülmələr və siyasi təzyiqlər olmuşdur. Eyni zamanda, tarixi abidələrin dağıdılması və mədəni irsin məhv edilməsi də müşahidə olunur. O, həmçinin qeyd edib ki, Prezident cənab İlham Əliyevin rəhbərliyi ilə Qərbi Azərbaycanla bağlı aparılan məqsədyönlü fəaliyyət, bu mövzuda hazırlanan elmi əsaslı nəşrlər və beynəlxalq platformalarda səsləndirilən haqlı mövqelər, soydaşlarımızın öz yurdlarına təhlükəsiz qayıdışını təmin etməyə yönələn mühüm addımlardır.

Tədbirdə digər çıxış edənlər vurğulayıb ki, Ermənistan ərazisindən zorla çıxarılmış soydaşlarımızın beynəlxalq proses çərçivəsində təhlükəsiz və ləyaqətli şəkildə öz doğma torpaqlarına geriyə qayıtmaları, onların fundamental hüquqlarının bərpa və təmin edilməsi ölkəmizin prioritetlərindəndir. Qərbi Azərbaycandakı soydaşlarımıza qarşı beynəlxalq hüquqa zidd əməllərin cəzasız qalmasından istifadə edən Ermənistan 30 ildən çox müddətə Azərbaycan torpaqlarını işğal altında saxlayıb. Ermənilər tərəfindən azərbaycanlılara qarşı yalnız etnik təmizləmə siyasəti həyata keçirilməyib, eyni zamanda, soydaşlarımıza məxsus maddi-mədəni irsin yer üzündən tamamilə silinməsinə yönəlik vandalizm aktları törədilib.

Həmçinin çıxış edənlər müasir elmi yanaşmalar və yeni fundamental araşdırmalar əsasında hazırlanmış “Qərbi Azərbaycan irsi” kitabının I cildinin nəşr olunmasının əhəmiyyətindən söhbət açaraq, kitabda qeyd olunan təkzibedilməz faktların tarixi əhəmiyyətli elmi tədqiqat materialı və hüquqi baxımdan ciddi bir sənəd olduğunu vurğulayıblar.

Mina RƏŞİD