15.12.2024, 10:26 125
Torpağına qədəm basan,
Əldə bayraq, dildə Azan.
Al qanıyla tarix yazan,
Şəhidlərə salam olsun!
- Bəli, 44 günlük müharibədə tarix yazdı igid övladlarımız, qorxusuz şəhidlərimiz. Uzun sürən işğala elə 44 gündəcə son qoydu Ali Baş Komandanın əmri və rəhbərliyi ilə Azərbaycan Ordusu!..
Bu günə doğum günü təsadüf edən qəhrəman şəhidlərimizdən biri də Arifdi.
Azərbaycan Ordusunun Xüsusi Təyinatlı Qüvvələrinin baş leytenantı olan Arif Firuz oğlu Abbaslı 1993-cü il dekabrın 15-də Şərur rayonunun Qıvraq qəsəbəsində anadan olub. 2009-2012-ci illərdə Heydər Əliyev adına Hərbi Liseydə, 2012-2016-cı illərdə isə Heydər Əliyev adına Azərbaycan Ali Hərbi Məktəbində (AAHM) təhsil alıb. O, 2020-ci il sentyabrın 27-də başlanan Vətən müharibəsi zamanı Murovdağın, Cəbrayılın və Füzulinin azadlığı uğrunda gedən döyüşlərdə savaşıb və bir çox mühüm tapşırıqları yerinə yetirib. Oktyabrın 12-də Füzuli istiqamətində döyüş tapşırığını yerinə yetirərkən qəhrəmancasına şəhidlik zirvəsinə yüksəlib. Son sözü "inanıram ki, bu dəfə biz qalib gələcəyik, ruhdan düşməyin, döyüşü davam eləyin",- olub.
Arif Abbaslı göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Kəlbəcərin azad olunmasına görə", "Füzulinin azad olunmasına görə", "Cəbrayılın azad olunmasına görə", "Xocavəndin azad olunmasına görə" medalları və "Qarabağ" ordeni ilə təltif edilib.
Allah nur üzlü şəhidimizə rəhmət eləsin.
Tahirə AĞAMİRZƏ
