İşğaldan azad edilmiş ərazilərdə yerləşən ümumi sahəsi 43 min hektar olan Bəsitçay Dövlət Təbiət Qoruğunun və Daşaltı Dövlət Təbiət Yasaqlığının fəaliyyəti bərpa edilib. Qaragöl Dövlət Təbiət Qoruğunun, həmçinin Qubadlı, Arazboyu və Laçın dövlət təbiət yasaqlıqlarının bioloji müxtəlifliyinin və təbiət abidələrinin bərpası istiqamətində də tədbirlər həyata keçirilir.

"Vətən səsi" xəbər verir ki, bunu ekologiya və təbii sərvətlər nazirinin müavini Vüqar Kərimov COP29 çərçivəsində “İqlim və biomüxtəliflik arasında əlaqə:dayanıqlı gələcək üçün inteqrasiya olunmuş həllər” adlı tədbirdə deyib. Onun sözlərinə görə, işğaldan azad edilmiş Şuşa, Xocalı, Ağdərə və Kəlbəcər rayonlarının inzibati ərazilərinin bir hissəsini əhatə etməklə yeni milli parkın yaradılması nəzərdən keçirilir: "Artıq bununla bağlı həmin ərazilərə baxış keçirilib, qiymətləndirmə işlərinə başlanılıb".

Nazir müavini deyib ki, biomüxtəlifliyin qorunmasında Azərbaycanın “Qırmızı kitabı” mühüm istiqamətverici sənəd hesab edilir. Onun sözlərinə görə, 30 illik fasilədən sonra işğaldan azad edilmiş ərazilərdə nadir və nəsli kəsilmək təhlükəsində olan növlər öyrənilərək 3-cü nəşrə daxil edilib: "Bioloji müxtəlifliyin qorunması istiqamətində regional və qlobal səviyyədə əməkdaşlığa xüsusi önəm verilir. Ölkəmiz bioloji müxtəlifliyin mühafizəsi sahəsində də fəaliyyət göstərən beynəlxalq təşkilatlarda uğurla təmsil olunur. Ətraf mühitin və xüsusən canlı həyat üçün əsas sayılan bioloji müxtəlifliyin beynəlxalq ictimaiyyətin birgə səyləri ilə qorunması, onun məhvolma təhlükələrinin öyrənilməsi və aradan qaldırılması aktual məsələlərdəndir. Biomüxtəlifliyin ayrı-ayrı komponentlərinin ümumilikdə ekosistem və xüsusilə də onun əsas tərkib hissəsi hesab edilən meşə ehtiyatları ilə əlaqələndirilmiş şəkildə mühafizəsi mühüm əhəmiyyət daşıyır".

Vüqar Kərimov əlavə edib ki, Azərbaycan 2025-ci ilin iyun ayında “Davamlı Meşəçilik və Biomüxtəliflik üçün Sinerji: Yaşıl Dünya naminə Əməkdaşlıq Dialoqu” adlı beynəlxalq konfransa ev sahibliyi edəcək. Onun sözlərinə görə, meşəçilik və biomüxtəliflik sahəsində qlobal çağırışları müzakirə etmək üçün elm adamları, ekoloqlar, siyasətçilər, beynəlxalq təşkilatlar, özəl sektor və vətəndaş cəmiyyəti nümayəndələri tədbirə dəvət olunacaq: "Bütün maraqlı tərəfləri bu konfransda iştirak etməyə dəvət edirik. Məhdud meşə örtüyünə malik ölkələrin problemlərini həll etməyə, qlobal dayanıqlığa töhfə verən innovativ həlləri təşviq etməyə və tərəfdaşlıqları gücləndirməyə çalışacağıq. Konfrans ən yaxşı təcrübələrin bölüşülməsi və daha yaşıl gələcək üçün əməkdaşlığın inkişafı üçün mühüm platforma olacaq".

Elxan SALAHOV