12.09.2024, 09:00 269
- Bu gün kiçik çavuş, Vətən Müharibəsinin qəhrəman şəhidi Səxavət Vahab oğlu Məmmədovun doğum günüdür. O, 1996-cı il sentyabrın 12-də Ağdam rayonunun Paşabəyli kəndində anadan olub. Ailənin sonbeşiyi idi. Səxavət Ş.Qasımov adına orta məktəbi bitirib. 2014-cü ildə hərbi xidmətə yollanıb. 2016-cı ildə hərbi xidmətini uğurla başa vurub. Səxavətin atası və dayısı hərbçi olduğundan uşaqlıqdan onun da bu sahəyə xüsusi rəğbəti olub. O, 2018-ci ildən MAXE kimi qulluq etdiyi Mingəçevir N saylı hərbi hissədə nümunəvi xidmətinə görə fəxri-fərmanlarla təltif edilib.
Azərbaycan Ordusunun kiçik çavuşu Səxavət Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsinin sonuna qədər mərdliklə vuruşub. İgid döyüşçü Suqovuşan, Füzuli, Qubadlı və Laçının azadlığı uğrunda gedən döyüşlərdə şücaətlər göstərib.
Səxavət Məmmədov 2020-ci il noyabrın 9-da Laçın rayonu istiqamətində yaralanır. Ona geri qayıtmağı təkid etsələr də Səxavət döyüş yoldaşlarından ayrılmır və elə həmin vaxtda da şəhadətə ucalır. Şəhidimizin nəşi bir aya yaxın neytral zonada qaldıqdan sonra Ağdam Şəhidlər Xiyabanında böyük izdiham və ehtiramla torpağa tapşırılır.
Azərbaycan Prezidenti İlham Əliyevin müvafiq sərəncamlarına əsasən Səxavət Məmmədov ölümündən sonra "Vətən uğrunda", "Cəsur döyüşçü", "Suqovuşanın azad olunmasına görə", "Qubadlının azad olunmasına görə" və "Laçının azad olunmasına görə" medalları ilə təltif edilir.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
