16.05.2024, 10:52 287
- Bu gün Vətən müharibəsi şəhidi, MAXE əsgər Elgin Ağayar oğlu Abbaslının doğum günüdür. O, 1991-ci il mayın 16-da Laçın rayonunun Dəyhan kəndində dünyaya göz açıb. 1992-ci ildə Laçın işğal olunduğu üçün ailəsi didərgin düşərək Sumqayıta köçüb. Onlar burada Sarıqaya qəsəbəsində məskunlaşıblar. Sumqayıtda orta təhsilini aldıqdan sonra Elgin hərbi xidmətə yollanıb. Hərbi xidmətini başa vurduqdan sonra 2014-cü ildən müddətdən artıq həqiqi hərbi xidmət qulluqçusu kimi Vətənə xidmət etməyə başlayıb. O, Pirəkəşküldə hərbi hissədə tibb bölüyündə xidmət edirdi.
Azərbaycan Silahlı Qüvvələrinin əsgəri olan Elgin Abbaslı 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində Füzuli, Cəbrayıl, Zəngilan, Qubadlı, Laçın və Şuşanın azadlığı uğrunda gedən döyüşlərdə iştirak edib.
O, Füzulidə, Cəbrayılda, Hadrutda, Xocavənddə, Şuşa ətrafında gedən döyüşlərdə xeyli sayda yaralını xilas edib. Şuşada qələbə günündə öz şərəfli vəzifəsini yerinə yetirərkən qəhrəmancasına şəhadətə ucalıb.
Şəhidimiz böyük izdiham və ehriramla Sumqayıt Şəhidlər Xiyabanında dəfn edilib.
Azərbaycan Prezidenti İlham Əliyevin müvafiq sərəncamlarına əsasən Elgin Abbaslı ölümündən sonra "Vətən uğrunda", "Füzulinin azad olunmasına görə" və "Şuşanın azad olunmasına görə" medalları ilə təltif edilib.
Şəhidimiz ailəli idi, onun Nəzrın adında bir qızı Vətənə yadigar qalıb.
Cənnətdəki doğum günün mübarək, məzarın nurla dolsun, qəhrəman şəhidim!
Mina RƏŞİD
