• Azərbaycan nümayəndə heyətinin 30 ildən sonra ilk dəfə  Xankəndi və Xocalıda ekoloji monitorinq aparmaq məqsədi ilə yola düşməsi Qarabağda erməni talanını növbəti dəfə aktuallaşdırdı. Aidiyyatı qurumlar faydalı qazıntı yataqlarına yerində baxış, ətraf mühitə, yeraltı və yerüstü sərvətlərə dəyən zərərin müəyyənləşdirilməsi üçün təmasların davam etdirildiyini açıqladılar.

Öncəliklə bildirək ki, torpaqlarımızın işğal altında qaldığı müddətdə 20-dən artıq ölkənin şirkəti Qarabağda qanunsuz fəaliyyətlə məşğul olub, sərvətlərimizi istismar edib. Daha çox Böyük Britaniya, Fransa, İran, Amerika Birləşmiş Ştatları, Rusiya, İsveçrə, Almaniya, Hollandiya və digər dövlətlərin şirkətlərinin adı hallanır. Son on ildə sözü gedən şirkətlər tərəfindən Qarabağa  40 milyon dollar investisiya qoyulub. Ən çox talanan təbii ehtiyatlarımızdan birincisi isə qızıl ehtiyatlarıdır.  

Milli Geoloji kəşfiyyat xidmətinin rəisi Əli Əliyev məsələyə münasibət bildirərkən deyib ki, bu yataqların sırasında zəngin ehtiyatlara malik Söyüdlü qızıl yatağı, Qızılbulaq qızıl yatağı, Ağduz dağ qızıl yatağı, Şorbulaq və Ağyataq civə yataqları, Mehmana polimetal yatağı, Dəmirli mis yatağı böyük ehtiyatlara malikdir və təbii ki, bütün bunların istismara verilməsi  ölkəmizin dağ-mədən sektorunun inkişaf etdirilməsi  və böyük ehtiyatların kəşf edilərək istismara verilməsinə xidmət edəcək.

2022-ci ilin avqust ayında yaradılmış “Base Metals” şirkəti uzun müddət Ağdərə rayonunun Qızılbulaq kəndindəki mis qızıl mədənlərini işlədib. Mədəndən hər ay 12 min ton filiz çıxarılıb və saflaşdırma kombinatında  emal edilib. Konsentrat Ermənistana aparılıb burda təkrar emal olunduqdan sonra  tərkibində qızıl olan mis  Avropa bazarına çıxarılıb.  Bu şirkət Avstraliyanın “İnternational Base Metals” şirkətinin törəmə müəssisəsidir və  həmin ölkədə yaşayan erməni  iş adamı tərəfindən qurulub.

Ə.Əliyev daha sonra vurğulayıb ki, Azərbaycan ərazilərində Ermənistan silahlı qüvvələri tərəfindən  qanunsuz iqtisadi  və digər fəaliyyətlə məşğul olan şəxslərə qarşı hüquqi tədbirin tətbiqi baş prokurorluq tərəfindən  daim nəzarətdə saxlanılır. Vergi yoxlamalarının nəticələri və məhkəmə-mühasibatlıq ekispertizasının rəyinə əsasən ümumilikdə 6 şirkətin 306 milyon 821 min manat məbləğində külli miqdarda gəlir əldə etməklə qanunsuz sahibkarlıq fəaliyyətini həyata keçirməsinə əsaslı şübhələr müəyyən edilib. Qanunsuz iqtisadi fəaliyyətlə məşğul olan 166 hüquqi şəxslə bağlı 35 dövlətə hüquqi tapşırıqlar göndərilib. İşğal dövründə  və işğaldan sonra istismar olunan sərvətlərin sırasında meşə fondunun adı çəkilməlidir.  Azad ərazilərdə 1988-ci ildə meşə fondu 228 min hektar təşkil edirdi. 2020-ci ildə isə cəmi 174 min hektar, yəni 54 min hektar meşə fondu Ermənistan tərəfindən məhv edilb və yandırılıb.

Beynəlxalq instansiyalar isə ermənilərin törətdiyi bu cinayətlərlə bağlı susqunluq nümayiş etdirirlər.

Hazırladı: Tahirə AĞAMİRZƏ