26.08.2025, 17:48 136
- Kəlbəcər işğaldan azad ediləndən sonra həmin rayonda yenidən qurulan kiçik su elektrik stansiyalalarından 3-nün indiyədək istehsal etdiyi elektrik enerjisinin həcmi açıqlanıb.
"Vətən səsi" xəbər verir ki, Energetika Nazirliyinin yaydığı hesabata əsasən, cəmi iki il əvvəl, 2023-cü ilin avqustun 25-də istismar olunan “Çıraq-1” və “Çıraq-2” kiçik su elektrik stansiyalarında indiyədək 91,4 milyon kilovat/saat elektrik enerjisi istehsal edilib. Tərtər çayı üzərində yerləşən və ümumi gücü 8,33 MVt olmaqla, hər biri 4,165 MVt gücündə 2 ədəd hidroaqreqatdan ibarət basqılı derivasiya tipli “Çıraq-1” KSES-də istismara verildiyi tarixdən iyulun 1-dək 51 milyon kilovat/saat elektrik enerjisi istehsal edilib. Qaraarxac çayı üzərindəki “Çıraq-2” KSES-də isə bu ilin iyul ayınadək 40,4 mln. kVt-saat elektrik enerjisi əldə olunub. Hər biri 3,0 MVt gücündə 2 ədəd hidroaqreqatdan ibarət olan həmin stansiyanın ümumi gücü 6 meqavatdır.
Kəlbəcər rayonu əörazisində, Tərtər çayı üzərində yerləşən daha bir enerji mənbəyinin - 2023-cü il avqustun 25-də istismara verilmiş “Soyuqbulaq” kiçik su elektrik stansiyasında indiyədək 42 milyon kilovat/saat elektrik enerjisi istehsal edilib. Basqılı derivasiya tipli “Soyuqbulaq” KSES-in ümumi gücü 5,3 meqavat təşkil edir.
Xatırladaq ki, hazırda Kəlbəcər rayonunda 10 ədəd KSES yenidən qurulub. Bunlar “Kəlbəcər-1” (Lev çayı üzərində 6,3 meqavat gücündə), “Qamışlı” (Qamışlı çayı üzərində 6,3 meqavat gücündə), “Meydan” (Meydançay üzərində 3,4 meqavat gücündə), “Aşağı Vəng”, "Yuxarı Vəng", “Nadirxanlı”, “Çaykənd”, “Çıraq-1”, “Çıraq-2” və "Soyuqbulaq" stansiyalarıdır. Həmin stansiyaların hamsında ekoloji cəhətdən təmiz yaşıl enerji istehsal olunur.
Elxan SALAHOV
