12.11.2024, 09:32 180
- COP29 tədbiri dünyanın ən böyük tədbirlərindən biridir.
Bunu COP29 tədbiri zamanı jurnalistlərə açıqlamasında Alban-Udi Xristian dini icmasının sədri Robert Mobili deyib.
O bildirib ki, bu tədbirin əsas məqsədi yaşıl dünyamızı qorumaqdır.
“Dünya bizim ümumi evimizdir. Bura gələn qonaqlar Qarabağda və digər bölgələrimizdə olacaqlar. Bu da ölkəmizə gələn qonaqların öz gözləriylə Azərbaycan həqiqətlərini görməsinə, şahidlik etməsinə səbəb olacaq. Azərbaycanın necə güclü və sabit ölkə olduğunu görəcəklər.
Qarabağda mədəni və dini irsimiz ermənilər tərəfindən demək olar ki, silinib. Onlar Alban kilsələrini dağıdıb və saxtalaşdırıblar. Bütün bunları dövlətimiz bərpa edəcək. Bu bizim tariximizdir”,-deyə o qeyd edib.
Qeyd edək ki, dünən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək. (Trend)
