12.01.2023, 12:35 290
- Prezident İlham Əliyevin sərəncamı ilə 2023-cü il “Heydər Əliyev İli” elan olunub. Bu münasibətlə Azərbaycan Milli Elmlər Akademiyası tərəfindən silsilə tədbirlərin təşkili və müxtəlif elmi əsərlərin nəşri nəzərdə tutulub. Bu barədə AMEA Rəyasət Heyətində keçirilən müşavirədə müzakirələr də aparılıb.
Müşavirədə AMEA-nın prezidenti akademik İsa Həbibbəyli bildirib ki, “Heydər Əliyev İli” çərçivəsində keçiriləcək tədbirlər və nəşr ediləcək əsərlər Heydər Əliyev epoxasının reallıqlarını cəmiyyətə çatdırmaqla bərabər, müstəqil Azərbaycan dövlətinin müasir mərhələsinin möhtəşəm nailiyyətləri də, elmi əsaslarla əks etdirməlidir. Ulu öndər Heydər Əliyevin və Türkiyə Cümhuriyyətinin 100 illik yubileyləri münasibətilə Azərbaycan-Türkiyə birgə elmi konfransının keçirilməsi də planlaşdırılıb.
İsa Həbibbəyli qeyd edib ki, “Heydər Əliyev İli” ilə əlaqədar akademiyanın tabeliyində olan və əhatə etdiyi elmi müəssisə və təşkilatlarda qarşıdakı həftədən etibarən tədbirlərin keçirilməsi müəyyənləşdirilib.
Müşavirədə AMEA-da 2023-cü ildə keçiriləcək struktur islahatları və elmi problemlər haqqında tapşırıqlar da verilib. Akademiyada elektron sənəd dövriyyəsinə keçid, problem şuralarının fəaliyyətinin optimallaşdırılması, yekun elmi hesabatların müzakirələrinin miqyasının genişləndirilməsi kimi məsələlər müzakirə olunub.
Hazırladı: Mina RƏŞİD
