12.03.2026, 09:26 61
- Bakı və İrəvan arasında münasibətlərin normallaşması həm Gürcüstan, həm də bütövlükdə bütün region üçün kifayət qədər vacibdir.
Bunu gürcü siyasətçi, 2001-ci ildən 2008-ci ilə qədər Gürcüstan parlamentinin sədri vəzifəsini tutmuş Nino Burcanadzе XIII Qlobal Bakı Forumu çərçivəsində jurnalistlərə bəyan edib.
"Mən məmnuniyyətlə qeyd edirəm ki, bu gün Azərbaycan və Ermənistan arasında münasibətlər tamamilə fərqli səviyyədədir. İstərdim ki, onlar bundan sonra da möhkəmlənsin, sabit və sülh şəraitində qalsın. Bu, şübhəsiz ki, yalnız Azərbaycan və Ermənistana deyil, həm də Gürcüstan və bütövlükdə bütün region üçün mühüm əhəmiyyət kəsb edəcək. Ona görə də səmimi olaraq arzulayıram ki, bu münasibətlər dinamik və sülh ruhunda inkişaf etsin", - o qeyd edib.
Qlobal Bakı Forumunun keçirilməsinə toxunaraq, o qeyd edib ki, bu, çox maraqlı tədbirdir və həmişə böyük diqqət cəlb edir.
"Siyasi təcrübə və qərarlar bu gün heç vaxt olmadığı qədər vacibdir. Biz Prezident İlham Əliyevin forumda iştirakını çox yüksək qiymətləndiririk. Şübhəsiz ki, onu dinləmək çox maraqlı olacaq, çünki İlham Əliyevin həyata keçirdiyi siyasət Cənubi Qafqaz regionu üçün və ümumilikdə böyük əhəmiyyət kəsb edir. Təbii ki, biz hazırda İranda və onun ətrafında, bütün regionda baş verən mürəkkəb prosesləri də müzakirə edəcəyik, çünki dünyaya sülh lazımdır. Bu, nə qədər çətin olsa da, bu münaqişəni mümkün qədər tez başa çatdırmağa imkan verəcək bir həll yolu tapmaq lazımdır", - siyasətçi əlavə edib. (Report)
