28.11.2025, 14:22 207
- "Bu günlərdə "Exo Moskva" radiosunun sabiq baş redaktoru Aleksey Venediktov kimilərinin gündəmə gətirdiyi məsələlər əslində reallıqdan tamam uzaqdır. Onlar heç də ermənilərə demirlər ki, “Qarabağı alıb sizə verəcəyik”. Sadəcə olaraq, iddia edirlər ki, Qarabağ məsələsi hələ bağlanmayıb".
"Vətən səsi" xəbər verir ki, bunu politoloq Rasim Musabəyov "Teleqraf"a müsahibəsində Rusiyadakı bəzi siyasi dairələrdə Azərbaycan əleyhinə aparılan kampaniyalara münasibət bildirərkən deyib. Onun sözlərinə görə, Rusiyanın imperialist düşüncəli təxribatçı qüvvələrdən fərqli olaraq Ermənistan hakimiyyəti və xalqın böyük kəsimi reallıqları qəbul edərək Azərbaycanla münasibətlərin normallaşdırılmasının tərəfdarı kimi çıxış edir: "Ermənistanın Baş naziri Nikol Paşinyan da deyir ki, Qarabağ mövzusu bağlanıb, ruslar isə gəlib onun əksini söyləyir. İddiaları da odur ki, bu mövzu qapadılmayıb, çünki Qarabağ erməniləri mövcuddur, “tarix” və insanların düşüncələri var. Ona görə "bu məsələ hələ də gündəlikdədir" iddiası ilə çıxış edirlər".
Rasim Musabəyov bildirib ki, ruslar bu cür sərsəm iddialarla Ermənistanda Paşinyanın əlehdarlarına ruh verməyə çalışırlar: "Guya, Moskva onların iddialarının təmin olunması üçün səylər göstərəcək. Amma burada Moskvanın görəcəyi bir iş qalmayıb. Ona görə də Venediktov kimilərinin dediyinin təbliğatdan kənar heç bir əhəmiyyəti yoxdur. Bu baxımdan belə bir iddiaların səslənməsi heç bir rezonans da yaratmadı. Qarabağda ermənilər olduğu dövrdə, əllərində silah olanda belə Rusiya onlar üçün heç nə edə bilmədi. Bundan sonra nə edə bilər ki?! İndiki halda ermənilər də bunu daha yaxşı dərk edirlər".
Xatırladaq ki, "Exo Moskva" radiosu bundan əvvəl də bir neçə dəfə təxribat xarakterli verilişlər yayımlayraq erməniləri Azərbaycana qarşı yönəltməyə çalışıb. Lakin bu cür qızışdırıcı kampaniyalar heç bir fayda vermədən sabun köpüyü kimi yox olub.
Elxan SALAHOV
