• Azərbaycanla Ermənistan arasında sərhədlərin delimitasiyası prosesinin hansısa mərhələsində İrəvan 57 kvadrat/kilometr ərazini Bakıya təhvil verməli olacaq.

"Vətən səsi" xəbər verir ki, bu barədə Ermənistanda Paşinyan hökumətinə müxalif mövqeyi ilə seçilən "Hraparak" qəzeti məlumat yayıb. Nəşr iddia edir ki, hələ 1991-ci ilə qədər SSRİ hökumətinin rəsmi sənədlərində və xəritələrdə Ermənistanın ərazisinin 29 min 800 kvadrat/kilometr olduğu göstərilirdi. Lakin Baş nazir Nikol Paşinyan bir müddət öncə ölkə ərazisinin 29 min 743 kvadrat/kilometr olduğunu bəyan edib: "Paşinyan Ermənistan ərazisinin 29 min 743 kvadrat/kilometr olduğunu bəyan edəndən sonra ictimai rəydə dəqiq rəqəm kimi məhz bunu qəbul edirlər. Amma Paşinyanın dövriyyəyə buraxdığı bu rəqəmə inanmayanlar da var və xüsusilə müxalifət ölkənin malik olduğu ərazi sahəsinin kiçildildiyini söyləyir".

Erməni mətbuatı iddia edir ki, Ermənistanın SSRİ dövründəki ərazisi ilə Nikol Paşinyanın elan etdiyi indiki rəqəmlər arasındakı 57 kvadrat/kilometrlik fərq Azərbaycana qaytarılması nəzərdə tutulan torpaqlar hesabına yaranıb: "Yəni, Paşinyanın qeyd etmədiyi 57 kvadrat/kilometr ərazi delimitasiya prosesi vasitəsilə yaxın gələcəkdə Azərbaycana qaytarılacaq. Bu, böyük ehtimalla uzunluğu 42 kilometr, eni isə 5 kilometr olacaq "TRİPP yolu" layihəsinin mühafizə zolağına düşən torpaqlara aid ərazidir. Lakin Sünik bölgəsindən keçən və azərbaycanlıların "Zəngəzur dəhlizi" adlandırdığı yola aid torpaqların ümumi sahəsi 210 kvadrat/kilometrə qədər arta bilər".

"Hraparak" qəzeti Azərbaycanın da Ermənistanın nəzarətinə qaytaracağı ərazilərin olduğunu iddia edir. Nəşrin yazdığına görə, Baş nazir Nikol Paşinyan sərhədlərin delimitasiyası və demarkasiyası prosesi çərçivəsində Artsvaşen (ermənilər Gədəbəyin Başkənd kəndini belə adlandırır) kəndinin Ermənistana təhvil veriləcəyini güman edir: "Baş nazir bəyan edib ki, Azərbaycanla sərhədlərin delimitasiyası prosesi zamanı Ermənistan Bakının nəzarəti altında olan "suveren ərazilər"ini geri istəyəcək. Bu, o deməkdir ki, biz Artsvaşeni və Ermənistanın digər suveren ərazilərini geri qaytarmalıyıq. Əgər Ermənistan beynəlxalq səviyyədə tanınan 29 mib 743 kvadrat/kilometr ərazisinə arxalanarsa, bu, digər məsələlərlə yanaşı, beynəlxalq tərəfdaşlardan hərbi-texniki əməkdaşlığa, o cümlədən lazım gəldikdə silahların alınmasına dair məhdudiyyətləri aradan qaldırmağa imkan verəcək. Çünki müxtəlif ölkələr Ermənistanla əməkdaşlığa müharibə deyil, sülh kontekstində baxdıqları üçün bu cür məhdudiyyətlər tədricən aradan qaldırılır".

Elxan SALAHOV