22.10.2025, 17:20 151
- “Nə üçün Ermənistan və Azərbaycan arasında sülh mümkün oldu? Bu, hələ açıq müzakirə olunmayan bir məsələdir, sadəcə mənim şəxsi təəssüratım və düşüncəmdir. Prezident Əliyevlə bu mövzuda heç vaxt ayrıca danışmamışıq. Mənim fikrimcə, görünməz bir amil var idi ki, sülhü mümkün etdi".
"Vətən səsi" xəbər verir ki, bunu Ermənistanın Baş naziri Nikol Paşinyan Gürcüstanda keçirilən V Tbilisi İpək Yolu Forumunda çıxışı zamanı deyib. O, qeyd edib ki, Cənubi Qafqaza daha geniş mənzərədən baxmaq lazımdır: "Tarixin göstərdiyi kimi, münaqişələr, ziddiyyətlər və uzunmüddətli düşmənçiliyə baxmayaraq, bizim – Ermənistan və Azərbaycanın, eləcə də ümumilikdə Cənubi Qafqaz ölkələrinin taleləri müəyyən mənada bir-biri ilə bağlıdır. Münaqişə və düşmənçilik çox vaxt bizə ümumi maraqların mövcud olduğunu görməyə imkan vermir. Bugünkü müsbət ab-hava nəyi göstərir? Bu o demək deyil ki, münaqişə tariximiz birdən-birə silinib və yoxdur. Xeyr, belə bir şey ola bilməz. Sadəcə bu o deməkdir ki, biz artıq bir qədər çox dərk etməyə başlamışıq: Cənubi Qafqaz ölkələri - Gürcüstan, Azərbaycan və Ermənistan ortaq maraqlara malikdirlər. Bu ortaq maraqlar strateji əhəmiyyət daşıyır".
Ermənistanın Baş naziri ortaq maraqlar kontekstində gələcəkdə üç ölkəni birləşdirəcək nəqliyyat komuniksiyalarından da danışıb: "Regiondan keçən yüklər, boru kəmərləri ölkələrimizə gəlir gətirəcək. Beləliklə, ortaq tərəfdaşlıq bazasına malik olacağıq. Dövlət büdcələrimiz, ictimai gəlirlərimiz artdıqca, hamımız eyni gündəliyə sahib olacağıq: necə etməliyik ki, bu gəlirlər azalmasın, əksinə, artsın. Budur, mənim danışdığım ən sadə ümumi maraqlar bazası”.
Elxan SALAHOV
