• Bu günün əlamətdar olması həm də, müasir Azərbaycan dövlətinin  memarı, Ulu Öndər Heydər Əliyevin adı ilə bağlıdır. Belə ki, dahi siyasətçi 3 oktyabr 1993-cü ildə Prezident seçkilərində xalqın mütləq əksəriyyətinin səsini qazanaraq Azərbaycan Respublikasının Prezidenti seçilib. Ulu Öndərimiz Heydər Əliyev 1993-cü il oktyabrın 10-da isə dövlətə və xalqa sədaqət andı içərək Azərbaycanı böyük bəlalardan, faciələrdən qoruyub. Ölkəmizi sabitlik, iqtisadi inkişaf və tərəqqi yoluna çıxarıb və qlobal enerji-kommunikasiya layihələrini reallaşdırmaqla Vətənə sədaqətlə xidmətin əyani nümunəsini yaradıb. Ümummilli Lider andiçmə mərasimindəki nitqində belə deyib: “Bu gün mənim üçün tarixi, əlamətdar bir gündür. Mənə göstərilən bu böyük etimada görə Azərbaycan vətəndaşlarına, Azərbaycan xalqına hörmətimi, məhəbbətimi bildirir və əmin etmək istəyirəm ki, həyatımın sonuna qədər xalqıma sədaqətlə xidmət edəcək və bütün fəaliyyətimi Azərbaycan Respublikasının gələcək inkişafına sərf edəcəyəm”.

Doğrudan da, hakimiyyəti dövründə Ulu Öndərimiz andına sadiq qalaraq həm daxili, həm də xarici siyasəti ilə Azərbaycanın inkişafına böyük töhfələr verib. Hedər Əliyev bütün dünyada torpaqlarımızın 20 faizindən çoxunu işğal altında saxlayan Emənistana qarşı böyük bir siyasətci, uzadgörən dövlət xadimi kimi mübarizə aparıb. Elə bu haqlı çıxışlarına, səylərinə görə dünyada ölkəmiz haqqında düşmənin yaratdığı mənfi imic getdikcə dəyişməyə başlayıb və nəticədə bir çox böyük dövlətlərin Azərbaycanın ərazi bütövlüyünü dəstəkləyən, Ermənistanın isə işğalçılıq siyasətini pisləyən qətnamələrin və bəyanatların qəbul olunmasına nail olub.

Bu gün böyük azərbaycanlı, dahi siyasətçi Heydər Əliyevin ruhu şaddır. Çünki onun siyasi yolunu layiqincə davam etdirən Prezident, Ali Baş Komandan İlham Əliyev bu böyük insanın, həm də doğma atasının vəsiyyətini yerinə yetirərək 44 günlük Vətən müharibəsində şanlı Zəfər qazanmaqla torpaqlarımızı 30 illik işğaldan azad edib.

Ulu Öndəri xatırlayarkən bizi sanki bir nəğmə də müşayiət edir.

Sən elə bir zirvəsən, küləklər neyləyəcək,
Dünənim, bu günümsən, səninlədir gələcək.
Nə qədər Azərbaycan, nə qədər bu millət var,
Heydər Xalqım deyəcək, Xalq Heydər söyləyəcək!
Mina RƏŞİD