11.04.2025, 14:15 209
- Milli Məclisin deputatı, Qərbi Azərbaycan İcmasının sədri, Qərbi Azərbaycana Qayıdış üzrə Təşəbbüs Qrupunun rəhbəri Əziz Ələkbərli xarici ölkə parlamentlərinin nümayəndələrini Ermənistandan didərgin salınan insanlarla bağlı ədalətsizliyə qarşı mübarizəyə çağırıb.
Ə.Ələkbərli bu barədə 4-cü Antalya Diplomatiya Forumu çərçivəsində keçirilən “Qlobal idarəçilikdə parlament diplomatiyası” mövzusunda paneldə danışıb.
O deyib ki, türk-müsəlman əhali XX əsrdə bir neçə dəfə sistemli şəkildə məcburi deportasiyaya məruz qalıb və hazırda Ermənistandakı dədə-baba torpaqlarında bir azərbaycanlı belə qalmayıb:
“1987-91-ci illərdə sonuncu deportasiya dalğasında 300 mindən çox Azərbaycan türkü öz ata-baba yurdundan məqsədyönlü şəkildə didərgin salındı, tarixi abidələrimiz, əcdadlarımızın qəbirləri məhv edildi. Bununla həm də bəşəriyyətin maddi-mənəvi irsinə külli miqdarda ziyan vuruldu".
Ə.Ələkbərli əlavə edib ki, Qərbi Azərbaycan problemi regional müstəvidən çıxıb.
"Biz silahlı münaqişə nəticəsində öz torpaqlarımızdan qovulduq. Ümumdünya İnsan Hüquqları Bəyannaməsinin 13-cü maddəsi təsdiq edir ki, hər insanın öz ölkəsinə qayıtmaq hüququ var. Amma Ermənistan bu qanunları pozur. Halbuki rəsmi Bakı vaxtilə ölkəmizdə yaşayan, vətəndaşımız olan ermənilərin qayıtma hüququnu tanıyır”, - o vurğulayıb. (Report)
