• Ötən ilin sentyabrında keçirilən antiterror tədbirləri zamanı Ermənistana qaçaraq burada "icma" şəklində fəaliyyətini davam etdirən separatçıların davranışları rəsmi İrəvan üçün əməlli-başlı başağrısınıa çevrilib. Özlərinin qaçqın kimi qələmə verənləri ətrafına toplayaraq hökumətdən mənzil, iş, sosial yardım və digər güzəştlər tələb edən qondarma "arsax respublikası"nın təmsilçiləri xaricdəki erməni lobbisi ilə hökumət arasında inamsızlıq yaratmağa çalışır. Elə buna görə də Paşinyan hakimiyyəti separatçıların İrəvandakı təmsilçiliyini birdəfəlik ləğv etmək, Qarabağdan qaçan və hazırda Ermənistanda yaşayan çox az sayda erməni ailələrinin problemlərini öz üzərinə götürmək istəyir. Həmçinin separatçıların istifadəsində olan bina da onların əlindən alınacaq.

"Vətən səsi" xəbər verir ki,  bu barədə Ermənistanda nəşr olunan “Hraparak” qəzeti məlumat yayıb. Bildirilir ki, Ermənistan hakimiyyəti Xankəndidən İrəvana qaçan separatçıların fəaliyyətinə tamamilə son qoyulması istiqamətində hərəkətə keçib: "Bir neçə həftə əvvəl Ermənistan parlamentinin sədri spiker Alen Simonyan “artsax təmsilçiliyi” məsələsinə yenidən baxmağı təklif etmişdi. Spiker çıxışından sonra onların fəaliyyət göstərdiyi binanın əllərindən alınması məsələsi gündəmə gəlmişdi. Məlumatlara görə, hakimiyyət “artsax” məsələsini tamamilə bağlamaq üçün Samvel Babayanı yenidən oyuna cəlb edib. Hədəf “Qarabağ erməniləri” arasında fikir ayrılığı yaratmaq, sonra isə binanı tamamilə ələ keçirməkdir. Dünən Babayanın 20-ə yaxın tərəfdarı “artsax nümayəndəliyi”nin qarşısında etiraz aksiyası keçirərək, sosial problemlərin həlli üçün “struktur” yaradılmasını tələb ediblər".

Nəşr yazır ki, artıq ləğv edilmiş qondarma "artsax"ın İrəvandakı təmsilçilərinin əsas tələbi Qarabağdan Ermənistana qaçmış ermənilərin sosial problemləri ilə məşğul olacaq  “struktura” məhz Samvel Babayanın rəhbərlik etməsidir: "Onlar istəyirlər ki, Samvel Babayan "icmanın" rəhbərliyindən kənarda qalmasın. Digər tələb isə odur ki, Qarabağdan gətirilən və “investisya fonduna” məxsus olan pullar haqqında müntəzəm olaraq hesabat verilsin. Əslində bu, Babayanın “təmsilçiliyi” ələ keçirmək, daha sonra bağlamaq planına xidmət edir”.

Elxan SALAHOV