Baş nazir Nikol Paşinyan reallığa uyğun olmayan belə bir fikir səsləndirib ki, guya erməni ordusu yaratmaq zərurəti Azərbaycanın sülh şəraitində yaşamaq istəməməsindən yaranıb.
O, əlavə edib ki, hər bir ölkə özünü müdafiə etmək üçün ordusunu yeniləşdirmək hüququna malikdir. İlk baxışda burada qeyri- adi heç nə olmadığı qənaətinə gəlmək olar. Amma erməni mentaliteti deməyə əsas verir ki, ermənilər müdafiə üçün deyil, əksinə, başqasının ərazisini zəbt etmək məqsədilə ordu yaradıb. Törətdiyi cinayətlərin isə analoqu olmayıb. Minlərlə soydaşımızın amansızlıqla qətlə yetirilməsi, işğal olunmuş ərazilərimizin xarabalığa çevrilməsi bunun inkaredilməz sübutudur. 44 günlük müharibədə biabırçı məğlubiyyətə uğrayan və tamamilə məhv olmaq təhlükəsindən yalnız Müzəffər Ali Baş Komandanımızın və xalqımızın yüksək humanizmi sayəsində qurtulan erməni ordusunun başbilənlərinin indi də yeni silahlar əldə etməyə çalışmaları bu toplumun heç vaxt sülh, əmin- amanlıq şəraitində yaşamaq istəməməsinin təzahürüdür.
Çıxışında "yenə təkrar edirəm güclü və döyüşkən ordu yaratmaq əsas vəzifəmizdir", - deyən baş nazir N.Paşinyanın bunun üçün durmadan çalışmaq lazım gəldiyini vurğulaması isə ermənilərin yeni təxribatlar törətməsinə hazırlıq gördüyü anlamına gəlir. Amma bir danılmaz həqiqət var ki, Azərbaycan əsgəri yeri gələrsə onlara daha güclü dəmir yumruq endirməyə qadirdir.
N.Qaramanlı