• İstedadlı şair, Yazıçılar Birliyinin üzvü Şakir Xanhüseynli (Orucəliyev Şakir Taaxan oğlu) Yardımlı rayonunun Alar kəndində anadan olub. ADPU-nun filologiya fakültəsini bitirib. İki şeir kitabının müəllifidir. Həyatın acılı-şirinli anlarını özünəməxsus istedadla şeirə gətirən Ş.Xanhüseynli Azərbaycanın böyük Zəfərinə, müqəddəs şəhidlərimizin unudulmaz xatirəsinə bənzərsiz poetik nümunələr də həsr edib. Şairin Zəfər nəğməli, Qarabağ ünvanlı şeirlərindən “Vətən səsi”nin oxucularına təqdim edirik.   

 

BİR DƏQİQƏLİK XATİRƏ SÜKUTU

 

Bir xalqın, heç danışmasa da,

hər an eşidilən səsidi,

sanki ilahi qatdan gələn səsidi

bir dəqiqəlik xatirə sükutu...

 

bir şəhid atasının qürurudu,

daşlaşmış dərdidi-

o, dünyanın ən mərdidi-

susaraq qəlbini dilə gətirməsidi

bir dəqiqəlik xatirə sükutu...

 

üstündən neçə dəqiqə keçib, saat ötüb,

sanıram mən hələ də

o bir dəqiqəlik sayğı duruşundayam...

ey şəhidim, qarşındayam;

sən məndən irəlidə.

ay igidim,

bəy igidim,

bir yerdə keçirəcəyik, inan-

axı, inamın həmişə olub-

önümüzdəki çox-çox illəri də....

 

23 SAAT 43 DƏQİQƏ

 

Olur ki, illər çəkir,

qərinələr ötür

-qoy-götür dünyasıdı-

çox uzanır bir addımlıq yol,

amma böyük bir işə

bəzən yetir bir neçə saat, dəqiqə,

hə...

olur ki, inanmırsan vaxtın

bunca ləngliyinə

və bir an kimi keçən həftələrə, aylara...

köhnəlir ümidlərə biçdiyin don da,

üstünə sel gəlir, daş yağır,

sən qarabağır...

bu qarğaşalar, qovğalar,

bir-birini qovmalar

bir andanmı asılı?

çıxırıq sanasan

arzu, həyat axtarışına

və bir qəfil zaman partlayışından

elə bil

sevinc fişəngləri zəfər tağlarını bəzəyir,

bax ha...

23 saat 43 dəqiqə

il boyunda, ay boyunda

bir nur gərdanlıq,

İşıq, Aydınlıq,

sevincli-göz yaşılı

xatirələr olacaq həm də...

 

ŞƏHİD

 

Bir gündə hər saata

düşdü iki, üç şəhid...

...Boynumuzun ardında

Var hey bir qılınc, şəhid...

 

Qurbanlığı sandın yol;

Yaşın cəmi iki on...

Doğma yurd... dedin ilk o,

Başqa hər şey puç, şəhid...

 

Anana ruzu-qəmin,

Atana ruzu-qəmin;

Getməz bu azuqənin

Dadı, tamı heç, şəhid...

 

Bu cür olmalı dedin-

Vətən qalmalı dedin;

Hamı qalxmalı, -dedin,

Nə tezdi, nə gec, şəhid?

 

Qatlamadın diz, yumdun,

Gördük, axı, biz, yumdun;

Torpaq üstdə göz yumdun,

Torpaq altda aç, şəhid!

 

Ay elə gəldi gedər,

Gün belə gəldi gedər;

Ay bizə ağır kədər,

Ay bizə güvənc şəhid!

 

Hazırladı: Mina RƏŞİD