07.11.2025, 09:49 205
- Azərbaycan Respublikasının Medianın İnkişafı Agentliyi - ölkədə media sahəsinin inkişafına, jurnalistikanın peşəkarlıq səviyyəsinin yüksəldilməsinə və informasiya təhlükəsizliyinin təmininə dəstək göstərən dövlət qurumudur. Agentlik media subyektlərinə dəstək, tədqiqatların təşkili və informasiya siyasətinin gücləndirilməsi istiqamətində fəaliyyət göstərir.
Azərbaycan Respublikasının Medianın İnkişafı Agentliyi, Azərbaycan Respublikasının Gənclər Fondu və “Regional İnkişaf” İctimai Birliyinin birgə təşkilatçılığı ilə “Milli Mətbuat 150 – Rəqəmsal erada gənclər və media savadlılığı” layihəsi çərçivəsində Qarabağ Universitetində görüş keçirilib.
Bu barədə universitetin məlumatında bildirilib.
Görüşdə Medianın İnkişafı Agentliyinin əməkdaşı Aynur Zeynallı, “Regional İnkişaf” İctimai Birliyinin İctimaiyyətlə əlaqələr və kommunikasiya şöbəsinin müdiri Murad Qasımlı iştirakçıları salamlayaraq belə tədbirlərin gənclərin media savadlılığının artırılmasına, informasiya cəmiyyətində fəallıqlarının yüksəlməsinə və milli mətbuat ənənələrinin təbliğinə mühüm töhfə verdiyini qeyd ediblər.
Daha sonra Mədəniyyət Televiziyasının direktoru Dilarə Səlim media tarixindən, medianın əsas prinsiplərindən və əsas terminlərdən bəhs edərək iştirakçılara etibarlı məlumat mənbələrinin seçilməsi ilə bağlı praktik məsləhətlər verib.
Qeyd edək ki, layihənin əsas məqsədi rəqəmsal əsrdə gənclərin media və informasiya mühitində məsuliyyətli mövqeyinin formalaşdırılması, yeni media alətlərindən istifadə bacarıqlarının inkişaf etdirilməsi, dezinformasiya ilə mübarizədə maarifləndirmə işinin gücləndirilməsi və gənclər arasında həmrəyliyin artırılmasıdır.
Tahirə AĞAMİRZƏ
