• İşğaldan azad edilən ərazilərin Azərbaycanın ümumi enerji sisteminə qoşulması, dayanıqlı və fasiləsiz elektrik enerjisi ilə təchiz edilməsi məqsədilə Qarabağ və Şərqi Zəngəzurun demək olar ki, bütün bölgələrində yeni yarımsatansiyalar qurulur, elektrik enerjisi təsərrüfatı kompleks şəkildə yenilənir.  Həm "Azərenerji" QSC, həm də "Azərişıq" ASC tərəfindən icra edilən bu cür layihələr bir qayda olaraq "Böyük qayıdış" proqramı çərçivəsində yenidən qurulan yaşayış məntəqələrinin bərpasının ilk mərhələsində həayata keçirilir. Məhz buna görə də bərpa olunan ərazilərə köçürülən keçmiş məcburi köçkünlərin yaşadıqları evlər elektrik enerjisi ilə tam və fasiləsiz təmin olunur.

"Vətən səsi" xəbər verir ki, Qarabağ və Şərqi Zəngəzurun işğaldan azad olunmuş ərazilərində son 5 il ərzində 38 su elektrik stansiyası tikilib. Hər iki bölgənin elektrik enerjisi ilə təminatında vacib rol oynayan və bütövlükdə ölkənin enerji sisteminə əlavə güc verən həmin stansiyaların çoxu Laçın və Kəlbəcər rayonundakı çayların üzərində inşa edilib. Hazırda Kəlbəcər rayonunda 10 ədəd KSES fəaliyyət göstərir. Bunlar “Kəlbəcər-1” (Lev çayı üzərində 6,3 meqavat gücündə),  “Qamışlı” (Qamışlı çayı üzərində 6,3 meqavat gücündə), “Meydan” (Meydançay üzərində 3,4 meqavat gücündə), “Aşağı Vəng”, "Yuxarı Vəng", “Nadirxanlı”, “Çaykənd”, “Çıraq-1”, “Çıraq-2” və "Soyuqbulaq" stansiyalarıdır. Rayonun üç kəndində - Aşağı Vəng, Nadirxanlı və Çaykənd ərazisində qurulmuş KSES-lərin illik istehsal gücü 68 kilovat/saatdır ki, bu da 25 min abonentinin dayanıqlı və fasiləsi elektrik enerjisi ilə təmin olunmasına kifayət edir.

Laçın rayonunda isə indiyədək 9 KSES istismara verilib və hazırda bir neçə stansiyada tikinti-quraşdırma işləri davam etdirilir. Ümumilikdə 2030-cu ildək Qarabağ və Şərqi Zəngəzurda KSES-lərin sayının ümumi gücü 467 meqavat olmaqla 72-yə çatdırılması nəzərdə tutulur.

İşğaldan azad olunmuş ərazilərin elektrik enerjisi ilə təminatı məqsədilə böyük gücə malik yarımstansiyalar da qurulur. Təkcə Cəbrayıl, Qubadlı və Zəngilan rayonlarının hər birində “Azərenerji” QSC tərəfindən inşa edilən 110/35/10 kilovoltluq  yarımstansiyalar hazırda tam gücü ilə işləyir.  “Ağdam-1” və “Ağdam-2” yarımstansiyalarının da tikintisi başa çatıb. “Xındırıstan” yarımstansiyası, artıq istifadəyə verilmiş “Şuşa” və Füzuli” şəbəkələri də işğaldan azad olunmuş ərazilərin enerji təminatında xüsusi çəkiyə malikdir.

Yüksək gücə malik elektrik şəbəkələrinin qurulması böyük sənaye parkının fəaliyyət göstərdiyi Ağdamda da geniş vüsət alıb. “Azərişıq” ASC-nin həyata keçirdiyi layihələr çərçivəsində rayon mərkəzi ilə yanaşı,bir sıra kənd və qəsəbələrin də elektrik şəbəkəsi infrastrukturu kompleks şəkildə yenidən qurulub. Artıq rayonun yenicə məskunlaşdırılmış Xıdırlı, Sarıcalı və Kəngərli kəndlərinə köçmüş ailərin yaşadığı evlər, inzibati binalar, ictimai iaşə xidməti obyektləri fasiləsiz elektrik enerjisi ilə təmin edilib. Hazırda işğaldan azad edilmiş ərazilərdə elektrik enerjisi infrastrukturlarının yaradılması ilə bağlı işlər davam etdirilir.

Elxan SALAHOV