17.03.2022, 14:20 306
Ölkəmizə səfər edən Türkiyə Respublikasının Milli Mina Fəaliyyət Mərkəzinin (MAFAM) rəhbəri general Mehmet Zeki Erenin başçılıq etdiyi nümayəndə heyəti Azərbaycan Respublikasının Minatəmizləmə Agentliyinin (ANAMA) İdarə Heyətinin sədri Vüqar Süleymanovla görüşüb.
ANAMA-dan bu barədə verilən məlumatda bildirilir ki, görüşdə tərəflər arasında gələcək əməkdaşlıq üzrə danışıqlar aparılıb və hər iki qurum tərəfindən “Partlayıcı sursatların təhlükəsinə dair maarifləndirmə” proqramı çərçivəsində icra edilən fəaliyyətə dair təcrübə mübadiləsinin aparılması müzakirə edilib. Həmçinin qeyri-texniki tədqiqat təliminin keçirilməsi, informasiyanın idarə edilməsi və coğrafi informasiya sistemlərinin istifadəsinin təkmilləşdirilməsi istiqamətində fikir mübadiləsi aparılıb.
MAFAM rəhbəri Azərbaycanda həyata keçirilən genişmiqyaslı minatəmizləmə əməliyyatlarının Agentlik tərəfindən əlaqələndirilməsinin əhəmiyyətli olduğunu vurğulayıb.
Qeyd edək ki, Türkiyə ilə humanitar minatəmizləmə fəaliyyətləri çərçivəsində əməkdaşlığın genişləndirilməsi məqsədilə yaxın zamanda ANAMA və MAFAM arasında anlaşma memorandumunun imzalanması nəzərdə tutulur.
