• Ölkəmizin işğaldan azad edilən ərazilərində yerləşən Rusiya sülhməramlılarının nəzarətində olan Azərbaycan torpaqlarına ekoloqların‚ jurnalistlərin‚ ictimaiyyət nümayəndələrinin, həmçinin qeyri-hökumət təşkilatlarının təmsilçilərinin buraxılmaması qanunsuz hərəkətdir və bunu özbaşınalıq kimi xarakterizə edirik. Rusiya sülhməramlı kontingentinin müvəqqəti məskunlaşdığı ərazilərdə qanunsuz erməni hərbi birləşmələrinin və erməni separatçılarının ekoloji terror törətmələri‚ Azərbaycan ərazilərindəki təbii sərvətləri talayaraq istismar etmələri növbəti müharibə cinayətidir. Ermənistan hərbi birləşmələrinin ekoloji terror törətməsi faunanı və atmosferi məhv etməkdir. Dünya ictimaiyyəti və aidiyyəti beynəlxalq təşkilatlar məsələyə biganə qalmamalı‚ onların nümayəndələri bölgəyə səfər edərək məsələni araşdırmalıdırlar. Ekologiyanı çirkləndirmək cinayətdir. Qarabağdakı qanunsuz erməni separatçı qüvvələri‚ İran rejiminə bağlı olan şirkətlər və şəxslərin özbaşına olaraq Rusiya sülhməramlı qüvvələrinin nəzarətində olan Azərbaycan ərazilərinə mütəmadi şəkildə gələrək bu ərazilərdə Azərbaycana məxsus yeraltı və yerüstü təbii sərvətləri talan etməsi nəticəsində ölkə iqtisadiyyatına ağır maddi zərər dəyib. İran rejiminə bağlı şirkətlərin‚ SEPAH və ETTEELAAT-ın Qarabağdakı erməni separatçılarının olduğu, rus sülhməramlılarının müvəqqəti yerləşdiyi ərazilərdəki təbii sərvətləri talayaraq terrora‚ silahların alınmasına‚ nüvə proqramını genişləndirməyə sərf edir. Son zamanlar Rusiya sülhməramlılarının nəzarətində olan ərazilərə edilən qanunsuz səfərlər rus sülhməramlıların qanunsuz fəaliyyətindən və özbaşınalığından xəbər verir. Üstəlik, Azərbaycan Respublikası Ekologiya və Təbii Sərvətlər Nazirliyinin əməkdaşlarının bölgədə yoxlama və təftiş aparmalarına‚ azərbaycanlı jurnalistlərin öz dədə-baba torpaqlarında çəkilişlər etmələrinə və bu ərazilərə gələn azərbaycanlıların oraya daxil olmalarına cidd-cəhdlə maneə törətmək və icazə verməmək özbaşınalığın ən kobud formasıdır. Belə sülhməramlı missiyası ola bilməz. Rusiya sülhməramlı kontingentinin fəaliyyəti, sadəcə, ərazinin təhlükəsizliyini təmin etməli olduğu halda‚ o, bunun əksini etməkdədir.

Bu fikirlər İsrail Təhlükəsizlik Akademiyasının mövzu ilə bağlı açıqlamasında yer alıb. Bildirilib ki, sülhməramlıların fəaliyyəti və missiyası, sadəcə, ərazinin təhlükəsizliyini təmin etmək‚ hər hansı təxribat‚ pozuculuq və terror hadisələrinin qarşısını almaq‚ ərazidə sabitliyi qorumaq‚ insanların və mülki sakinlərin rahat və maneəsiz gediş-gəlişini təmin etməkdir. Niyyəti sülh olmayan Rusiya kontingentinin Qarabağdakı fəaliyyəti sülhməramlılıq anlayışının və prinsiplərinin əksinədir, sülhməramlılıq yox‚ ermənilərə dəstək olmaq‚ Azərbaycan ərazilərindəki təbii sərvətləri talamaq‚ İran və Ermənistana sözügedən bölgədə şərait yaratmaq‚ erməni maraqlarını müdafiə etməkdən ibarətdir. Azərbaycanın dövlət orqanlarının fəaliyyətinə‚ mətbuatın çəkiliş aparmasına‚ ictimaiyyət nümayəndələrinin hərəkətinə cidd-cəhdlə mane olmaq Azərbaycan torpaqlarını qəsb etmək‚ mənimsəmək anlamındadır. İran və digər ölkələrdən sülhməramlıların yerləşdiyi ərazilərə qanunsuz səfərlərin edilməsi‚ Azərbaycana məxsus sərvətlərin İrana daşınması və üstəlik, buna sülhməramlıların şərait yaratması‚ azərbaycanlıları, xüsusilə media nümayəndələrini əraziyə buraxmamaq özbaşınalığın ən pik həddidir.

Diqqətə çatdırılıb ki, Azərbaycanın qeyri-hökumət təşkilatları və media mənsublarının Qarabağda aksiya keçirməsi haqq-ədalətin bərpasına xidmət edir. Azərbaycanın vətəndaş cəmiyyəti institutlarının nümayəndələrinin Laçın-Xankəndi yolunu bağlaması‚ aksiyanın daha da genişlənməsi doğru və haqlı addımdır. Azərbaycan haqlı tərəfdir‚ işğala və torpaqları talana‚ ərazisindəki təbii sərvətləri istismara məruz qalan tərəfdir. Beynəlxalq hüquq Azərbaycanın tərəfindədir. Qanunsuz erməni birləşmələri və erməni separatçıları Azərbaycan torpaqlarını tərk etməlidir. Ermənistan tərəfi ekoloji terroru və Azərbaycan ərazilərini talamağı dayandırmalıdır. Açıq-aşkar görünür ki‚ ermənilər Rusiya sülhməramlı qüvvələrinin dəstəyi ilə hazırda yerləşdikləri ərazilərdə talan və istismar etməklə məşğuldurlar. Qanunsuz erməni silahlıları Azərbaycan ərazilərindəki təbii sərvətlərin istismar olunaraq talanması işinə İranı və SEPAH-ı da cəlb edib. Rusiya sülhməramlılarının isə buna şərait yaratması beynəlxalq hüququn pozulmasıdır. Azərbaycana məxsus sərvətlərin‚ xüsusilə qızıl, gümüş və digər qiymətli metalların gizli şəkildə məhz İrana daşınması‚ bu marşrutla SEPAH və ETTEELAAT tərəfindən narkotik daşınması beynəlxalq cinayətdir. Rusiya sülhməramlıları buna şərait yaratdıqları üçün ərazini qapalı rejimdə saxlamağa çalışırlar. Bu səbəbdən həmin ərazilərə azərbaycanlıların daxil olmasına maneçilik törədilir.

“Bütün bunlara görə Xankəndi-Şuşa istiqamətində Azərbaycanın qeyri-hökumət təşkilatlarının və media nümayəndələrinin aksiya keçirməsi zəruri və lazımlı addımdır.

Biz aksiyanın keçirilməsinə‚ aksiyaya gələn hər kəsə öz dəstəyimizi ifadə edirik. Azərbaycanın haqlı mövqeyini‚ beynəlxalq ictimaiyyət və BMT tərəfindən tanınan ərazi bütövlüyünü‚ suverenliyini dəstəkləyirik. Bütün təhlükə və təhdidlərə‚ təxribat və siyasi hücumlara qarşı hər zaman Azərbaycan dövlətinin və xalqının yanında olduğumuzu bəyan edirik”, - deyə açıqlamada qeyd olunur. (AZƏRTAC)