22.06.2025, 09:54 111
- Yeni hesabatda Avropa Kosmik Agentliyi (ESA) 2040-cı ilə qədər kosmosun mənimsənilməsi üzrə iddialı bir konsepsiyanı ortaya qoyub. Mütəxəssislərin fikrincə, cəmi 15 ildən sonra insanlar Yerin yaxın orbitində, Ayda, Marsda və onlardan da uzaq bölgələrdə yerləşəcək “kosmik oazislərdə” yaşayacaqlar. Bu yaşayış məkanları tamamilə avtonom olacaq, enerji və ərzaq ehtiyaclarını müstəqil şəkildə təmin edəcək və nəticədə Yer kürəsindən ehtiyatların daşınması artıq keçmişdə qalacaq.
İnsan tərəfindən kosmosun tədqiqində atılacaq növbəti addımlar daha uzun müddətə kosmosda qalmağı və daha uzaq məntəqələrə səyahətləri əhatə edəcək. ESA mütəxəssislərinin fikrincə, bu təşəbbüslərin uğur qazanmasının əsas şərti Yer kürəsindən asılı olmayan infrastrukturun yaradılması olacaq.
Şübhəsiz ki, bu ideya olduqca həyəcanvericidir, lakin insanların onu cəmi 15 il ərzində gerçəkləşdirməsi üçün qarşıda böyük bir iş durur. Nəzərə almaq lazımdır ki, NASA və İlon Maskın “SpaceX” şirkəti qarşıdakı 20 il ərzində insanları Marsa göndərməyi planlaşdırsa da, mövcud kosmik gəmilərdən heç biri bu səfərə hazır deyil. (AZƏRTAC)
