Türkiyənin “Bozdağ Film” şirkəti tərəfindən Azərbaycan Respublikası Mədəniyyət Nazirliyinin təşəbbüsü və dəstəyi ilə şərti adı “Qarabağ – Vətən müharibəsi” olan çoxseriyalı bədii televiziya filminin istehsalına başlanılacaq. Bunu oktyabrın 18-də Beynəlxalq Muğam Mərkəzində filmin çəkilişinə həsr olunmuş brifinqdə Mədəniyyət Nazirliyi Audiovizual və interaktiv media şöbəsinin müdiri Rüfət Həsənov deyib. Ekran işi Azərbaycanla yanaşı, bir sıra xarici ölkələrdə də yayımlanacaq: “Əsas yaradıcı heyəti azərbaycanlı kinematoqrafçılardan ibarət olacaq serialın istehsalının ilkin hazırlıq mərhələsi yekunlaşmaq üzrədir. Çəkilişlər Bakı, Gəncə və Şuşa şəhərlərində, Füzuli, Quba, İsmayıllı, Daşkəsən, Şamaxı, Qəbələ, Xızı rayonlarında və Hadrut qəsəbəsində aparılacaq. Pirotexnika, rekvizit, səs və digər sahələr üzrə texniki, həmçinin yaradıcı heyət üzvləri müəyyən olunub və onlar artıq fəaliyyətə başlayıb. Aktyorlarla sınaq çəkilişləri də həyata keçirilib”.

R.Həsənov onu da diqqətə çatdırıb ki, 8 seriyadan ibarət filmin hər seriyası 1 saat olacaq. Filmin hazırlıq mərhələsində məkan seçimləri və digər məsələlərdə Müdafiə Nazirliyi, Daxili İşlər Nazirliyi və başqa qurumların da dəstəyi olub. Çəkilişlərə 2023-cü ilin mart ayından başlanacaq: “Hər seriya üçün 212 min dollar vəsait nəzərdə tutulur. İsmayıl İman tərəfindən yazılan ssenari daha sonra ümumi ssenari qrupu – həm türk, həm də azərbaycanlı ssenaristlər tərəfindən təkmilləşdirilib”.

Audiovizual və interaktiv media şöbəsinin sektor müdiri Rüfət Əliyev bildirib ki, filmin çəkilişləri ilə bağlı hazırlıqlar dəqiq və məsuliyyətli şəkildə aparılıb, hər bir detala diqqət yetirilib: “Gələcəkdə filmin beynəlxalq arenada yayımlanması işində “Bozdağ Film” şirkətinin də rolu olacaq. Hazırda şirkətin filmlərinin izləyici sayı ümumilikdə 6 milyard yarımdan çoxdur”.

“Bozdağ Film”in ölkəmizdə səfərdə olan nümayəndələri – baş direktor Bilgehan Özen və tanınmış aktyor Osman Albayrak bildirdilər ki, əməkdaşlar artıq üç aydır ki, Azərbaycanda hazırlıqlara cəlb ediliblər. Baş direktor əlavə etdi ki, Qarabağ savaşı bütün Türk dünyası üçün önəmli Zəfər tarixidir: “Bu Qələbəni layiqincə bütün dünyaya çatdırmaq üçün biz Azərbaycanı şəhər-şəhər, qəsəbə-qəsəbə, məhəllə-məhəllə gəzərək hazırlıqlara başladıq. Məqsədimiz filmi beynəlxalq platformalarda nümayiş etdirməkdir. Layihənin hazırkı adı şərtidir. Tam adını hələlik açıqlamaq istəmirik. Qarabağda işğaldan azad edilmiş ərazilərdə də olduq. Çəkilişləri Qarabağda da aparmağı planlaşdırırıq. Aktyorlar hazırda Azərbaycan Ordusunda hərbi təlim keçirlər. Tezliklə onların adları açıqlanacaq”.

Mina RƏŞİD