24.10.2023, 14:07 360
- Xalq artisti Hacıbaba Hüseynovun bu gün anım günüdür. O, 1919-cu il martın 15-də Bakıda anadan olub və ruhani ailəsində böyüyüb. 1941-ci ildə Böyük vətən müharibəsinin başlaması ilə "Parkommuna" zavodunda tornaçı işləməyə başlayıb. 1945-ci ildə müharibə bitəndən sonra Hacıbaba Hüseynovun qohumu, tanınmış xanəndə Sara Qədimova Hacıbaba Hüseynovu görkəmli pedaqoq, tarzən Əhməd Bakıxanovla tanış edib. Ə. Bakıxanov H. Hüseynovu öz ansamblına dəvət edib və onlar üç il birlikdə çalışıblar.
1962–1992-ci illərdə Hacıbaba Hüseynov Asəf Zeybnallı adına Azərbaycan Dövlət Musiqi Məktəbində muğamatdan dərs deyib. Nəzakət Məmmədova, Qədir Rüstəmov, Səxavət Məmmədov, Zaur Rzayev, Teymur Mustafayev və başqaları onun tələbələri olub.
Hacıbaba Hüseynov Rast muğamının "Üşşaq", "Hüseyni", "Novruzi ravəndə", digər muğamlarda olan "Şah Xətai" şöbələrinin ilk ifaçısı olub. Onun təşəbbüsü ilə Bayatı-Şiraz muğamının "Dilrüba" şöbəsi dərsliyə əlavə edilib.
Xanəndə 1989-cu ildən xarici ölkələrə qastrol səfərlərinə başlayıb. İlk səfəri böyük bir musiqiçi və ziyalı heyəti ilə İraqa olmuşdur. 1990-cı ildə Türkiyənin Adana şəhərində, 1991-ci ildə 1 ay ərzində Belçikanın Brüssel, Fransanın Paris, Marsel, Lyon, Monpelye şəhərlərində, İsveçrədə, Hollandiyada konsertlər verib. Xanəndənin son səfəri 1992-ci ildə on iki nəfərlik musiqiçi heyəti ilə 2 aydan artıq çəkən İran İslam Respublikasına olub.
Görkəmli xanəndə Hacıbaba Hüseynov 1993-cü il oktyabrın 24-də Bakıda vəfat edib. Birinci Fəxri Xiyabanda dəfn edilib. Allah rəhmət eləsin.
Mina RƏŞİD
