• Uşaqlığından hərbçi olmaq istədi, oldu. Hərb peşəsini seçəndə söz verdi ki, Xocalının qisasını alacaq, aldı. Öz toyunda özünə şəhid olmağı arzuladı, canından çox sevdiyi Vətən uğrunda şəhidliyin uca zirvəsinə yüksəldi. Bir zamanlar təkcə yaxın ətrafında tanınan Pəncəlini bütün Azərbaycan xalqı tanıdı, qəhrəmanlığı, qorxusuzluğu, mərdliyi ilə xalqımızın qəlbində özünə əbədi taxt qurdu igidimiz. Hər dəfə adını eşidəndə qürurlanır, onunla fəxr edirik. Pəncəli Teymurov eyni zamanda düşmən tərəfindən də yetərincə tanındı və qorxulu kabusuna çevrildi...

Bax, budur, qəhrəmamlıq məktəbi. Azərbaycanın yüzlərlə qəhrəmanları Pəncəli Teymurovun yolunu davam etdirərək 44 gündə qələbə sevincini yaşatdı xalqımıza...

Pəncəli Teymurov 1981-ci il martın 24-də Astara rayonunun Əzərüd kəndində anadan olub. 1986-1998-ci illərdə Astara rayonu, B.Rüstəmov Asxanakəran tam orta məktəbində orta təhsil alıb. 1999-cu ildə Astara Rayon Hərbi Komisarlığı tərəfindən həqiqi hərbi xidmətə çağırılıb.Hərbi xidmət zamanı kəşfiyyatçı peşəsinə yiyələnmiş və hərbi hissənin ən mahir kəşfiyyatçısı olmuşdur.

Hərbi xidməti başa vurduqdan sonra könüllü olaraq xidmətini yenicə yaradılan Azərbaycan Xüsusi Təyinatlı Qüvvələrinin kəşfiyyatçı-diversant taborunda davam etdirib və 17 il Azərbaycan ordusunda şərəflə xidmət edib. Pəncəli Teymurov 2013-cü il avqust ayında ailə həyatı quran Pəncəli doğmalarının, elin, obanın şadyanalıq etdiyi toyda özünə bunları arzu edib: " Dostlar, həqiqətən bəzi şeylər var ki, bizim əlimizdə deyil. Amma mən sidq ürəklə deyirəm.Hər zaman, hər an xalqım üçün, torpağım üçün, Vətənim üçün canımdan, qanımdan keçməyə hazıram.Həmişə özümə arzu etmişəm ki, Vətənim üçün şəhid olum, tabutum Azərbaycan Respublikasının üçrəngli, ay-ulduzlu bayrağına bükülüb dəfn olunmağa aparılsın".

Gizir Pəncəli Teymurov 2016-cı ilin aprel ayında Azərbaycan-Ermənistan təmas xəttində baş verən atışma zamanı Tərtər istiqamətində düşmənlə döyüşə girmiş və döyüş dostları- Murad Mirzəyev, Samid İmanov, Muhud Orucovla birgə Talış yüksəkliklərinin alınmasında və Talışda çoxlu sayda düşmənin məhv edilməsində şəxsi igidliyi ilə fərqlənmiş və 3 aprel 2016-cı il tarixdə son damla qanına qədər vuruşaraq qəhrəmancasına şəhid olmuşdur.

Aprelin 11-i isə Pəncəli Teymurovun nəşi doğulduğu Astara rayonunun Əzərüd kəndində gətirilərək böyük ehtiram və izdihamla son mənzilə yola salınıb. Dəfn mərasiminə minlərlə rayon sakini ilə yanaşı, şəhidin qulluq etdiyi hərbi hissənin əsgərləri və zabitləri də qatılıb. Dəfn mərasiminin sonunda yaylım atəşi açılıb və gizir Teymurov uğrunda şəhid olduğu torpağa tapşırılıb.

Hərbi tapşırıqları uğurla başa çatdırdığına görə müxtəlif döyüş mükafatları, medallarla təltif olunan Pəncəli ən böyük mükafatını 2015-ci ilin 24 iyununda almışdı. 2015-ci ildə işğal altında olan Kəlbəcər rayonunda xüsusi əməliyyat zamanı Ermənistan ordusuna məxsus bir neçə hərbi texnika, ağır artirelliya və iyirmidən çox hərbçi məhv edilmişdi. Bu əməliyyatda göstərdiyi yüksək bacarıq və peşəkarlığı, cəngavərliyi, nümunəvi xidməti nəzərə alınaraq komandanlığın təqdimatına əsasən ölkə Prezident İlham Əliyevin Sərəncamı ilə "İgidliyə görə" medalı ilə təltif edilib.

Allah şəhidimizə rəhmət eləsin.

Tahirə AĞAMİRZƏ