23.02.2023, 19:00 299
- Ağdam Muğam Mərkəzində “Ulu Öndər Heydər Əliyevin zəngin dövlətçilik irsinin təbliği və öyrənilməsi” mövzusunda tədbir keçirilib. Yeni Azərbaycan Partiyası Mərkəzi Aparatının təşkilatçılığı və Ağdam Rayon İcra Hakimiyyətinin dəstəyi ilə keçirilən tədbirdə Ağdam RİH-nin başçısı Vaqif Həsənov, aparatın əməkdaşları, Milli Məclisin deputatı Aqil Abbas, Azərbaycan Respublikası Müdafiə Sənayesi Nazirliyinin Milli Aerokosmik Agentliyinin baş direktoru Natiq Cavadov, YAP Ağdam rayon təşkilatının sədri Mansur Quliyev, şəhid ailələri və qazilər, hüquq mühafizə orqanlarının, idarə, müəssisə və təşkilatların rəhbərləri, rayon ictimaiyyətinin nümayəndələri və partiya fəalları iştirak ediblər.
Əvvəlcə Azərbaycan Respublikasının Dövlət Himni səsləndirilib, torpaqlarımızın ərazi bütövlüyü uğrunda şəhid olmuş Vətən övladlarının, Ulu Öndər Heydər Əliyevin və Türkiyədə baş vermiş zəlzələ nəticəsində həyatını itirən insanların əziz xatirəsi bir dəqiqəlik sükutla yad edilib. Tədbirdə çıxış edən icra başçısı Vaqif Həsənov və digər natiqlər Ümummilli lider Heydər Əliyevin dövlətçiliyimizin və müstəqilliyimizin qorunub saxlanmasında xalqımız qarşısında misilsiz xidmətlərindən, onun uğurlu siyasəti sayəsində müstəqil Azərbaycanın azərbaycançılıq fəlsəfəsi əsasında qısa müddətdə tanınıb möhkəmlənməsindən, inkişaf etmiş dünya ölkələri ilə əlaqələr quraraq bütün sahələrdə uğurlar əldə etməsindən geniş bəhs ediblər.
Sonda partiya sıralarına qoşulan bir qrup şəxsə YAP-ın üzvlük vəsiqəsi verilib, rayonun ictimai-siyasi həyatında fərqlənənlər isə fəxri fərmanla təltif olunublar.
Hazırladı: Mina RƏŞİD
