24.11.2022, 16:36 344
- Noyabrın 24-də keçirilən “E-köşk” qəzet və jurnalların rəqəmsal yayım platformasının təqdimat mərasimində “Eduaz.com” platforması üzərindən jurnalistlər üçün onlayn təlimlərin təşkil ediləcəyi barədə məlumat verilib. Təlimlər Medianın İnkişafı Agentliyinin, Media Təhlil Mərkəzinin, “EDUAZ co” MMC-nin və Anadolu Agentliyinin birgə əməkdaşlığı ilə həyata keçiriləcək.
Medianın İnkişafı Agentliyindən bildiriblər ki, bununla bağlı təqdimatla çıxış edən “EDUAZ co” MMC şirkətinin layihə meneceri Lalə Həsənova jurnalistlərin peşəkarlığının artırılması, bu sahədə yeni tendensiyaların öyrənilməsi məqsədilə medianın istifadəsinə veriləcək onlayn təlim platformasının daha geniş auditoriyanı əhatə edəcəyini, vaxta qənaət olunmasına şərait yaradacağını, məkan və zamandan asılı olmayaraq, təlimlərdən faydalanma və rahat funksionallıqdan istifadə imkanı təqdim edəcəyini vurğulayıb.
Təlimlərin sonunda onlayn sertifikatların təqdim edilməsini nəzərdə tutan layihə təkcə media nümayəndələri üçün deyil, eyni zamanda tələbələr, müəllimlər və biznes subyektləri üçün də müxtəlif mövzuların öyrənilməsi, şəxsi inkişafın təmin edilməsi sahəsində operativ və çoxməzmunlu platformaya çevriləcək, öyrənmə və inkişaf imkanlarını artırmaq istiqamətində effektiv yerli resurs olacaqdır.
Daha sonra platformada təşkil edilən kurslar barədə məlumat verilib, tədbir iştirakçılarını maraqlandıran suallar cavablandırılıb. (AZƏRTAC)
