19.12.2025, 07:51 215
- 18 dekabr 2025-ci il tarixində Azərbaycan Respublikasının Prezidenti İlham Əliyevin Sərəncamı ilə Azərbaycan Memarlıq və İnşaat Universitetinin rektoru, professor, əməkdar memar Gülçöhrə Hüseyn qızı Məmmədova Azərbaycanda təhsilin inkişafındakı böyük xidmətlərinə görə “Şərəf” ordeni ilə təltif olunub.
Gülçöhrə Məmmədova 1953-cü il aprelin 23-də Qərbi Azərbaycanın Vedi rayonunda dünyaya gəlib. Orta təhsilini 1971-ci ildə başa vurduqdan sonra Azərbaycan Politexnik İnstitutunun memarlıq fakültəsinə daxil olub, daha sonra təhsilini Azərbaycan İnşaat Mühəndisləri İnstitutunda davam etdirərək 1976-cı ildə məzun olub.
Elm və təşkilati fəaliyyətinə erkən yaşlardan başlayan Gülçöhrə Məmmədova 1975-ci ildə institutun komsomol komitəsinin katibi seçilib və 1979-cu ilə qədər bu vəzifəni icra edib. Həmin ildən etibarən pedaqoji fəaliyyətə başlayaraq memarlıq konstruksiyaları və abidələrin bərpası kafedrasında assistent kimi çalışmağa başlayıb. Sonrakı illərdə baş müəllim, dosent və professor elmi adlarına layiq görülüb.
1999-cu ildən bu günədək Azərbaycan Memarlıq və İnşaat Universitetinin rektoru kimi fəaliyyət göstərən alim, eyni zamanda memarlıq elminin inkişafında əhəmiyyətli xidmətlər göstərib. Onun elmi maraq dairəsi Qafqaz Albaniyasının memarlığı və xristian dini memarlığının tədqiqinə yönəlib. Bu sahədə yazdığı dissertasiyalar və hazırladığı bərpa layihələri ölkə daxilində və beynəlxalq miqyasda yüksək dəyərləndirilib.
Professor Məmmədova bir çox beynəlxalq konfranslarda iştirak etmiş, memarlıq abidələrinin qorunması ilə bağlı layihələrə rəhbərlik etmişdir. 2000–2005-ci illərdə Milli Məclisin deputatı kimi də fəaliyyət göstərmişdir.
Əməkdar memar olan Gülçöhrə Məmmədova daha əvvəl də “Şöhrət” ordeni, “Azərbaycan Respublikası Prezidentinin Fəxri Diplomu” kimi yüksək mükafatlarla təltif olunub.
“Şərəf” ordeni ilə təltif olunması isə onun uzun illər ərzində Azərbaycan memarlığına, elminə və təhsilinə verdiyi dəyərli töhfələrin yüksək qiymətləndirilməsi kimi dəyərləndirilə bilər.
Tahirə AĞAMİRZƏ
