30.11.2025, 08:47 77
- Millət vəkillərinin seçicilərlə mütəmadi görüşləri onların sosial rifahı və gündəlik qayğılarının dinlənilməsi baxımından mühüm əhəmiyyət daşıyır. Bu baxımdan Milli Məclisin deputatı Ceyhun Məmmədovun Sumqayıt şəhərində keçirdiyi növbəti vətəndaş qəbulu da sakinlərin müxtəlif sahələr üzrə problemlərinin dinlənilməsi və onların həlli istiqamətində atılan praktik addımların tərkib hissəsidir.
Milli Məclisin deputatı Ceyhun Məmmədov Sumqayıt şəhəri, 12-ci mikrorayon ərazisində yerləşən məcburi köçkün şəhərciyində, Qubadlı rayonu Əliquluuşağı kənd tam orta məktəbində vətəndaş qəbulu keçirib.
Qəbul zamanı C.Məmmədov vətəndaşlarla əvvəlcə ümumi formatda görüşüb, daha sonra isə fərdi şəkildə onların müraciətlərini dinləyib. Sakinlər tərəfindən səsləndirilən mövzular sosial problemlər, məşğulluq, infrastruktur, təhsil və digər sahələr üzrə olub. Hər bir müraciətin mahiyyəti dəqiqliklə qeydə alınıb və operativ şəkildə icraata yönləndirilməsi üçün zəruri addımlar müəyyən olunub.
C.Məmmədov vurğulayıb ki, qaldırılan məsələlərin araşdırılması və həlli məqsədilə aidiyyəti dövlət qurumları ilə əlaqələndirmə aparılacaq. Hər bir vətəndaş müraciəti üzrə fərdi qaydada baxış keçiriləcək və prosesin gedişatı nəzarətdə saxlanılacaq. Millət vəkili sonda qeyd edib ki, sakinlərimizin rahatlığı və rifahının təmin olunması fəaliyyətimizin əsas prioritetlərindən biri olaraq qalır.
Tahirə AĞAMİRZƏ
